ORANJESTAD (AAN): Un disturbio na nivelnan mediano y mas halto di atmosfera tanto Diamars anochi y tambe Diaranson marduga y mainta, a trece humedad y instabilidad den area di Aruba y demas islanan ABC.
Pesey for di Diamars anochi caba, monton di lamper a cuminza registra su mes na parti pabao y zuidwest di Aruba, pero tambe algun a cay riba lama parti zuidoost di Punta Basora, y un nubia diki tabata acerca for di pariba y a bay pabao y den area meymey di Aruba procedente di noordoost, manera por mira riba e imagen aki di radar di Meteo Curaçao. Tur punta preto ta representa un of mas aglomeracion di lamper cu a dal.
E calentamento di den dia ta combina cu e instabilidad aki, pa produci algun awacero local cu a bin cu lamper cu strena. Algun caminda awacero a cay basta modera.
Banda di 12:30 am, lamper a dal tambe den e red di coriente di NV Elmar y a afecta clientenan den area di Santa Cruz, como tambe Matividiri, Zumbo, Andicuri, Cashero, Ayo, y Siribana.
Manera ta conoci, tecniconan di NV Elmar ta warda prome pa tempo calma, pa asina nan por cuminsa traha pa busca e problema, y drecha esaki. E biaha aki casi yegando 2:00 am, tempo a lens un poco.
Pero ya pa 2:06 am, coriente a wordo estableci bek na tur e areanan afecta.
