Dialuna marduga
ORANJESTAD (AAN): E yobida ocasiona pa disturbionan cu a pasa desde Diadomingo anochi riba Aruba, y a sigui te Dialuna mainta, a bin acompaña pa lamper y strena.
Alrededor di 5:0p am, un lamper a dal riba wayanan di coriente di NV Elmar, y a corta coriente den area di Sabana Basora, Pos Chiquito, te Savaneta.
Poco rato despues banda di 5:42 am, otro lamper a dal atrobe riba wayanan di voltahe halto, y a laga den scur parti di Balashi y tambe Bringamosa. Tambe tin lamper a dal riba waya na Yara.
Sinembargo maltempo cu tur e lampernan aki, a crea un situacion cu personal di NV Elmar no por a cuminza traha bek riba restaura coriente, debi cu no ta safe pa haci esey. E tecniconan mester a warda te ora cu tempo a calma un tiki, pa por a core bay isola areanan di coriente, y cuminsa conecta coriente bek.
A cuminza haci esaki te banda di 7:12 am, y isolando e interupcion, nan a duna areanan poco mas leu, manera Pos Chiquito y parti di Sabana Basora bek cu coriente. Pero e lugarnan mes unda lamper a dal, a destrui varios componente di coriente, y nan tin di wordo reemplaza. E trabao ey a cuminza pa 7:38 am.
Esaki a dura casi 2 ora, y porfin pa 9:18 am e trabao riba waya di voltahe halto na Sabana Basora a keda cla, y pa 9:25 am henter Pos Chiquito y Sabana Basora a haya coriente bek.
A sigui traha e ora riba e waya di voltahe halto na Balashi cu a sufri daño, y tambe na e waya di Yara.
Pa 10:19 am a duna Savaneta coriente bek, y pa 10:27 am a duna coriente bek na Balashi y Biringamosa.
