70 aña pasa un Hulanda inunda a splica e peliger pa futuro
*E drama Hulandes di 1953 ta ehemplar den cambio di clima
*Reino Hulandes cu seis isla y un pais cu costa bou nivel di laman
ORANJESTAD(AAN)—Uno di e problemanan grandi pa mundo atende cu cambio di clima, mester wordo busca den e forma cu mundo na prome momento, a trata di evita cu su problema.
“E lobo ta bini” ta un spiertamento conoci pa e resultado negativo cu e por tin. Si e lobo no presenta y drama no presenta, bida ta sigui normal te na momento cu e lobo ataca.
Esaki segun expertonan ta uno di e motibonan, cu hende no a presta e atencion debido na e realidad mundial, afecta pa cambio di clima cu comportacion humano a provoca.
For di final di Siglo 19 y entrada pa Siglo 20, cientificonan a adverti pa cambio di clima na un mundo industrialisa cu no a presta atencion.
Proyectonan grandi cu a aporta na e peliger, a continua y te awe ta reta tur teoria aunke mundo liber a yega na acuerdonan pa deshaci di e menasa y peliger pa mundo, cu lo bira mas calor, lo conoce mas desastre natural cu lo bira mas serio pero tambe lo tin menos awa limpi.
Informantenan a mustra cu pa hende por comprende e peliger di cual ta papia, ta bira necesario pa presenta loke a yega di socede prome cu hende tabata capaz pa actua efectivamente contra peliger di laman, cu ta sumamente halto pa paisnan cu ta bou nivel di laman y islanan chikito.
“Den e actual constelacion di Reino Hulandes, e peliger di cambio di clima ta hunga un papel grandi, aunke Hulanda ta separa di teritorio Hulandes den Caribe dor di Oceano Atlantico,” informacion clave ta indica.
A wordo mustra cu tin motibo serio pa cual Hulanda ta hopi activo y alerta riba tereno di cambio di clima.
Na e momentonan aki, gobierno Hulandes hasta ta confronta companianan grandi di aviacion, cu mester baha nan cantidad di Pueblo, loke lo afecta directamente e entrada di e companianan aki.
Tambe, manera den diferente articulo anterior DIARIO a adverti, medidanan lo afecta biahenan largo cu lo afecta turismo entre otro.
Na Mei 2023, Aruba lo tin un conferencia di clima organisa hunto cu Hulanda. Na e ocasion aki dos pais cu cambio di clima ta pone directamente na peliger serio, lo atende hunto cu otro participantenan, e peligernan cu por spera riba tur tereno asocia cu clima, cu ta varia di enfermedadnan cu temperatura halto lo pone aumenta pa tur e cambionan cu mester introduci den uzo di aparatonan y ekiponan cu hende tin problema pa schrap di nan lista.
Sinembargo, kico cambio di clima por haci, ta realidad cu Hulanda por splica.
Hulanda ta un pais cu nivel mas abou cu laman, cu resultado dramatico pa e pais.
Si Hulanda, conoci na Frances como Pays-Bas (Pais Abou) no a construi defensananan contra laman, su costa actualmente lo ta completamente diferente ya cu mitar di e costa di Hulanda ta bou nivel di laman.
Na 1953 Hulanda a conoce desastre grandi ora tormenta a causa inundacion enorme na un parti di e costa Hulandes.
“Luctor et emergo” (mi ta lucha y keda riba awa) ta e palabranan riba e Escudo di Zeeland, e teritorio cu practicamente Hulanda a kita for di laman.
Aruba ta un isla y como tal sumamente vulnerabel mescos cu e otro islanan Hulandes den Caribe.
E cambio di clima pues pa tur parti di Reino Hulandes, ta exigi tur atencion ya cu e ta menasa futuro na forma directo hasta den e situacion actual, caminda manera ya bisa construccion di proteccion na Hulanda a evita cu parti di e pais ta bou awa; cu su riunan di awa dushi ta contamina y su produccion di cuminda ta wordo destrui.
“Durante temporada di horcan e vulnerabilidad di e islanan Hulandes den Caribe ta bini dilanti. Pero tur otro parti cu por afecta comunidad di islanan islanan chikito manera produccion di cuminda y proteccion di salud, tambe ta importante,” expertonan ta bisa.
Awe e lucha contra cambio di clima mester inspira pa yega na solucion, manera informantenan ta splica y manera DIARIO ya e importancia cu DIARIO ta duna na e materia, ta indica.
