Prome laboratorio na Aruba completamente acredita den tur disciplina
ORANJESTAD (AAN): LabHOH di Horacio Oduber Hospital cu orguyo ta e prome laboratorio na Aruba cu a logra acreditacion reconoci internacionalmente ISO-15189 cu e pakete amplio di pre-analyse, KCH, pathologie y medische microbiologie.
Raad voor Accreditatie ta reconoce servicio di laboratorio di calidad excepcional y alabes e credibilidad, y tambe dedicacion pa loke ta cuido di nos pashentnan. Gregory Croeze, miembro di Hunta di Directiva di HOH, no por a keda sin expresa e orguyo cu e ta sinti pa LabHOH cu e logro di e acreditacion di ISO 15189 di Raad voor Acreditatie reconoci mundialmente.
LabHOH ta e prome laboratorio cu ta completamente acredita den tur disciplina na Aruba y cu e pakete amplio nos ta brinda cuido na loke ta trata prome y di dos linea di cuido na Aruba y esaki ta refleha sigur e acuerdo colectivo di LabHOH.
E acreditacion ISO 15189 ta un seyo di calidad reconoci internacionalmenete cu ta evalua laboratorio medico riba su competencia tecnico, precision di resultado y implementacion di un sistema di maneho fuerte di calidad. \
Esaki ta subraya LabHOH su compromiso continuo pa cumpli cu e standardnan mas halto den cuido medico y diagnostico. “E trayecto tabata di 1 aña”, asina Ingmar Ramharakh, Coördinator Kwaliteit en Veiligheid, a inicia bisando. Ya caba e departamento di microbiologia tabata acredita pa cuater aña y un aña pasa a inicia cu e proceso pa acredita tur disciplina di LabHOH. Ramharakh den su funcion e acreditacion di calidad tin un gran nificacion pasobra esaki ta e prueba cu LabHOH ta brinda e servicio di calidad cu comunidad di Aruba merece.
Unico na Aruba
Montsy Brouns, Laboratorium specialist, a expresa e honor cu e ta sinti di por forma parti di un ekipo cu a logra e seyo di calidad den tur disciplina. E motibo principal ta pasobra LabHOH ta e unico laboratorio na Aruba cu ta conta cu e pakete completo di tur disciplina di specialisacion manera kimica, hematologia, patologia y microbiologia. “Nos ta e laboratorio di hospital di Aruba cu semper t’ey”, Brouns a enfatisa. Esaki ta nifica cu nan t’ey 24/7 pa nan pashentnan clinico y tambe pa brinda servicio na esnan cu ta yega na cada un di e localidadnan di prikpost.
Un team uni pa brinda calidad
E analistanan ta e prome cara cu e cliente y pashentnan ta encontra. Souheila Wegereef, Senior analist/functioneelbeheer, a duna di conoce cu e team ta uno hopi uni y riba mesun liña di proceso. Di e manera aki ta garantisa cu tur procedura ta na ordo pa brinda servicio di calidad. Y danki na e acreditacion aki reconoci internacionalmente ta duna tur cliente y pashent mas confiansa den LabHOH y su servicio di calidad.
Cyrielle Lacle-Diaz - Teamleider Pathologie, a conta cu e acreditacion aki ta nifica pa nan departamento cu na momento cu e material di e pashent yega LabHOH, lo atende cu ne di un manera standarisa pa asina por brinda e calidad segun e normanan internacional.
Innova y mehora
E acreditacion aki reconoci internacionalmente tambe ta refleha den e vision di HOH, cu ta duna cuido accesibel na tur hende, manteniendo e calidad riba e nivel mas halto.
Pa finalisa, Croeze a expresa cu e acreditacion aki, no solamente ta reconoce e nivel di calidad di cuido cu LabHOH ta brinda pa hopi aña caba, pero tambe e ta un compromiso cu HOH ta asumi cu e meta pa sigui innova y mehora continuamente.
