ORANJESTAD (AAN): Lilian Prins, presidente di Koningin Wilhelmina Fonds (KWF) a bisa cu apesar cu semper por conta cu e sosten di Aruba Bank,
e aña aki tabata un sorpresa grato ora cu e banco a duna di conoce cu un parti di e registracion pa e Aruban Bank Walk and Run lo bay pa e fundacion.
Prins a bisa cu KWF a wordo funda riba 4 di Februari 1961, pues mas cu 60 aña e fundacion ta sirbi comunidad di Aruba y muy en particular e pashentnan di cancer.
“Cancer ta bati practicamente tur dia na porta di hende y tin biaha na porta di hende cu menos bo ta pensa”.
Nos ta gradici Dios semper cu den comunidad Arubiano tin entidadnan manera Aruba Bank cu ta para tras di e fundacion aki y ta yuda nos cumpli tur luna cu nos gastonan, segun Prins.
El a sigui bisa cu debi na COVID-19 KWF no por a sali colecta riba caya y e aña aki cu a logra sali, no a logra haya ni 25 mil florin.
Esaki siendo cu e gastonan mensual di e fundacion no ta baha mas abao cu 12 pa 14 mil florin.
“E gastonan mas grandi cu nos tin ta ora cu nos duna e asistencia na cas, na pashentnan cu ta den nan ultimo fase y tur esaki ta gratuito”, segun Prins, kende a sigui bisa cu KWF ta paga transporte pa e pashentnan cu tin cu bay e diferente terapianan y no por yega.
El a sigui bisa cu aworaki un biaha mas Aruba Bank ta para tras di Koningin Wilhelmina Fonds y ta brinda su sosten.
E presidente di e fundacion a haci tambe un yamada na comunidad pa na duna aporte durante e 4 dianan den luna di September durante di cual ta bay tuma lugar e Aruba Bank Walk & Run.
