Mehora conexion aereo cu Europa
- Minister Wendrick Cicilia ta sostene e conexion Europeo
- Preparacion operacional ta andando pa acomoda e crecemento
ORANJESTAD (AAN): Ministerio di Turismo, Transporte y Labor di Aruba, den colaboracion cu Aruba Airport Authority N.V. (AAA), Bonaire International Airport (BIA) y Aruba Tourism Authority (ATA) ta orguyoso di anuncia e ampliacion di e schedule di vuelo di winter di KLM Royal Dutch Airlines.
Como resultado di un cooperacion regional fuerte y planificacion strategico, KLM lo introduci dos vuelo semanal adicional entre Amsterdam-Aruba, operando via Bonaire for di 15 di december 2025 te cu 27 di maart 2026.
E desaroyo aki ta marca un logro significativo den mehoracion di conexion aereo entre Caribe Hulandes y Europa, posicionando Aruba y Bonaire ainda mas como destinacionnan premier pa e biaheronan Europeo. E vuelonan lo ta dos biaha pa siman, riba diabierna y diadomingo cu un total di trinta ‘round trip’. Lo opera e vuelo cu Airbus A330-200 cu ta conta cu un capacidad di 264 asiento. E capacidad total di asiento pa e vuelonan ta mas o menos 7.920 asiento. Den total, Aruba por conta cu 9 vuelo di KLM pa temporada di winter.
E frecuencianan agrega lo mehora acceso na y for di e mercadonan grandi di Europa, incluyendo Inglatera, Alemania, Italia, Suisa y Scandinavia. E capacidad agrega ta ofrece mas flexibilidad y mas opcion pa e biaheronan, sosteniendo tanto turismo como biahe di negoshi pa e region.
Ministerio di Turismo: Ministro Wendrick Cicilia a reacciona riba esaki. El a bisa: “E dos vuelonan semanal nobo cu KLM ta marca un paso significante padilanti den nos strategia pa diversifica e mercadonan di turismo di Aruba. Door di expande conectividad pa mas ciudad Europeo, nos ta habri porta pa viaheronan di calidad halto, di distancia largo cu tipicamente ta keda mas largo y ta contribui significantemente na nos economia local.”
“E desaroyo aki ta fortalece nos posicion como un destinacion premier mientras ta percura pa un crecemento duradero y un base di bishitante internacional mas balansa”, asina Minister di Turismo y Transporte, mr. Wendrick Cicilia a duna di conoce.
Aruba Airport Authority: Jo-Anne Arends, Aviation Business Development Executive na Aruba Airport Authority, a declara: “Den nomber di Aeropuerto di Aruba, nos ta entusiasma di anuncia cu, despues di un colaboracion extenso cu nos stakeholdernan y hopi aña di esfuersonan dedica, nos a sigura exitosamente un aumento den e capacidad di aerolinea pa e destinacion clave aki.
E adicion di dos vuelo semanal for di Amsterdam, un hub grandi di Europa, ta fortalece significativamente nos conexion, ofreciendo acceso na Europa y ofreciendo conexion continuo tanto pa e mercadonan existente como esunnan nobo. Esaki ta marca e prome biaha cu KLM lo opera nuebe vuelo semanal pa Aruba durante e temporada di winter. Tur preparacion operacional ta andando pa acomoda e crecemento aki.”
Aruba Tourism Authority: “E ampliacion aki di nos programa di vuelo pa winter cu nos partner aereo Europeo, KLM, ta representa un paso importante den nos strategia di diversificacion. Por medio di un colaboracion di cerca cu nos socionan di Aruba Airport Authority entre otro, nos a logra oportunidadnan adicional cu lo por conduci na un crecemento di 9% for di e mercado Europeo pa aña 2025.
Esaki lo beneficia nos economia local y ta den liña cu esfuersonan adicional cu A.T.A. a lansa e aña aki, banda di accionnan existente caba den cuadro di desaroyonan riba nivel di e mercado Mericano. Nos ta masha contento cu e conectividad mehora cu esaki ta trece pa nos destinacion”, tabata palabranan di Ronella Croes, CEO di Aruba Tourism Authority.
Cooperacion cu Bonaire: E logro aki ta e resultado di un proposicion conhunto strategico desaroya pa Aruba Airport Authority y Bonaire International Airport, cu sosten completo di Ministerio di Turismo, Transporte y Labor di Aruba. E ta refleha e compromiso comparti pa avansa desaroyo di servicio aereo sostenibel den e region.
Palabra di gratitud special ta bay pa Ronella Croes, CEO di Aruba Tourism Authority y su team dedica pa nan excelente coordinacion, alineacion y sosten promocional den sigura e expansion aki. E vuelonan adicional no solamente lo fortalece e posicion di Aruba y Bonaire den e mercadonan Europeo pero tambe lo sostene crecemento di turismo a largo plaso, resiliencia economico y mehoracion di conexion tanto como pa e residentenan como pa e bishitantenan.
