Sue Ann Ras, Lider Codigo di Proteccion:
ORANJESTAD (AAN)—Sue Ann Ras, lider di Codigo di Proteccion, den entrevista cu DIARIO a splica tocante e ley di Kinderopvang (pa Centro di Cuido di Mucha), cu no a cuminza ayera pero ta data for di aña 2015 aunke desde 1992 e prome concepto di ley a wordo traha, pero a keda warda den lashi.
“Ami a haya e tarea na aña 2019 y na 2020 mi a cuminza ehecut’e. Y e ley tin un trayecto cu a cana for di 2015 cu e Gobierno anterior. El a cana su trayecto cu tabata den un stuur groep, den cual tabata tin hasta hendenan di veld di e crèchenan cu tabata den dje.
“ Ta nan, manera nan ta bisa, a traha e manual di regulacion, kiermen kico nos ta regula, pero hunto cu esey, e ley tambe. E ley a pasa den 2017, cu tur e puntonan aki riba dje, vooral locual nan ta papiando riba dje, e ‘Kind Leidster Ratio’ tabata hinca den e ley caba, y e tabata hinca den e manual di regulacion, for di 2017”, Sue Ann Ras a señala.
El a agrega cu nan a djis ehecuta esaki, pa wak cual ta e miho manera pa hacie. Pues, for di 2015 caba nan tabata sa cu esaki ta bay bin.
“Nos ta papiando di caso 10 aña pasa, pues no a yega bin aworaki. For di momento na 2020 cu mi a haya e tarea pa implementa aki, pasobra tin mas di 30 aña den cashi warda; nos ta papiando di aña 1992, cu e prome concepto di ley di Kinderopvang a bin ta sali afo, cu hasta Raad van Advies a duna, e tempo ey, conseho”, Sue Ann Ras a bisa.
E dama a sigui splica cu e ley aki ta simplemente pa regula tur locual ora di otorga un permiso pa opera un centro di cuido, manera tur pais rond mundo tin’e ta implica. “Nos ta, inclusive, e ultimo pais den region cu ta pasa e ley aki. E kind Leidster ratio, locual mi ta papiando di dje: Pakico un ley? Un ley semper ta bin pa regula algo. Nos sa cu nos ta trahando cu e grupo mas chikito y esun di mas vulnerable den nos comunidad, specialmente esun 0-4 aña. Kiermen cu, como pais bo mester bin cu un regulacion con bo kier pa bo pais opera of anda cu calidad di cuido di mucha, na un centro di cuido di 0 pa 4 aña. A base di esey mester tin un regulacion pa gobierno por otorga un permiso”, Sue Ann Ras, lider di Codigo di Proteccion a splica. Den nos siguiente edicion lo amplia riba e entrevista aki.
