E pregunta crucial den Pueblo cu no ta haya contesta concreto --- *Cultura y custumbernan nacional ta hunga papel importante --- *Cuanto avance medico ta costa un pais moderno anualmente?
ORANJESTAD (AAN) — Ta cu gran satisfaccion por a nota e cantidad di informacion cu a wordo presenta na momento cu a anuncia cu AZV ta bay cobra mas.
Nos a revisa tur e informacionnan cu a wordo presenta na Pueblo ultimo dia riba AZV y nos a nota e forma cu a splica e avance cientifico cu a tuma lugar, e crecemento di poblacion y cantidad mas halto di hende di mas edad, cu sin duda ta e factornan principal cu a afecta prijs di cuido medico pa un pais, pa no papia mes di e resultado di inflacion, transportacion di entre otro medicamento, cu ta hiba nos awe na e topico cu nos kier aborda.
Mescos cu ta e caso cu otro topiconan, hopi bez personanan cu ta presenta un topico ta lubida cu e gran mayoria di hende tin problema pa comprende di kico nan ta papia.
Esaki no ta solamente pa motibo di falta di educacion ricibi, pero sigur pa e motibo cu cada specialismo den un comunidad ta contene terminologianan dificil pa hende cu no ta atende directamente cu e asunto, atende.
Cu DIARIO no tabata nunca di acuerdo cu e base exclusivo di AZV den comunidad, ta un hecho conoci pa nos lector.
Cu gastonan di AZV mester a subi, ta un realidad sin mas cu nunca a wordo splica na Pueblo.
Nos ta duna un ehempel simpel. Un hende ta bay un dokter. Dokter ta caro, ta wordo conclui.
Pero cuanto ta costa un dokter pa e haci su trabou sin por cobra overtime pa e suma final aumenta poco?
E dokter mester di un oficina ekipa pa su mes y pa su personal den e edificio cu mester tin lugar pa pashent sinta.
E mester di instrument pa e traha cune. E mester di catuna. E mester di angua pa injeccion. E mester di alcohol pa desinfecta cuero. E mester di handschoen pa e traha y tapaboca.
Tur ta costa placa. Cada palito cu e ta uza ora e pidi hende habri boca pa e mira den garganta.
E mester di pen pa skirbi recept pero tambe e mester a sigui un estudio costoso pa haya sa ta kico a pasa cu e pashent y cual recept e mester skirbi.
E mester di aparatonan pa haci su trabou. Aparatonan y instrumentonan cu ta cambia den avance di cuido medico.
Pa un pashent haci un test di sanger, mester di un angua, catuna, tubo special, entre otro.
Ekipo pa analisa testnan ta cambia continuamente. Mester adapta of cumpra sistema nobo.
De hospital mester percura pa tin cama y ekipo. Mester tin “mat blauw” pa hende drumi ariba.
E cantidad di articulo cu mester pa brinda cuido medico, ta enorme. Cosnan chikito, pero cu bira un suma valiente.
Aparatonan pa haci test ta conoce evolucion enorme. Pero personal cu ta traha cu nan, mester studia pa por traha cu nan.
Pa traha como enfermera mester sigui estudio cu ta depende di e nivel di enfermera tambe. Asina nos por sigui y sigui riba tur tereno y indica kico ta parti di e suma total di cuido medico, cu ta keda desconoci pa Pueblo.
Educacion di Pueblo ta sumamente importante. Hende ta bay botica y ta haya remedi. Ta bebe pildo un dia y ta tira e frasco casi yen afo pasobra of a pensa cu a bira bon of ta pensa cu e pildo no ta sirbi. Ta bay dokter ta haya otro pildo.
Na mes momento nos no kier coopera pa baha e cantidad di enfermedad cu ta presenta nan mes.
Nos ta nenga pa bay cana y baha peso, cu ta percura pa problema medico. Nos ta prefera cu nos bariga grandi ta prueba cu nos tin placa pa come. Placapa come cuminda cu ta afecta salud di hende.
Pa lubida salud nos ta dal un betro, dos betro, tres betro ounke nos tin problema cu higra.
Cada hende cu salud cu ta empeora, ta bira un gasto mas grandi pa comunidad cu den e situacion di Aruba mester por paga AZV.
Cultura, tradicion, custumbernan tambe ta crea gasto pa Cuido Medico. Bebida alcoholico ta e mihor medicina pa un hende den dolor. Bebida ta produci dolor cu mester di medicina.
E costo di Cuido Medico ta enorme. Mester tin tur aparato pa e yiu nace. Mester tin cuido specialisa pa e pashent cu pulmonnan cu no ta funshona mas. Mester di angua, y pa su bisiña mester di catheter.
A yega e momento pa splica puecclo cuanto e gasto real di cuido medico ta, pa nan comprende na placa chikito,pakico nan mester paga mas pa servicionan medico.
