Partido RAIZ ta reflexiona
- ‘Si no cuida e weso di lomba, e curason no lo sigui bati’
ORANJESTAD (AAN): E luna di september ta worde dedica na Turismo. Aki na Aruba nos ta celebra e luna cu un atencion special na loke actualmente ta nos unico pilar economico, nos turismo.
Un boletin emiti Diaranson door di Partido RAIZ, a mustra cu e isla a conoce un crecemento inmenso cu mas di 1 miyon bishitante ya caba pa e aña aki segun datos di nos oficina di turismo - ATA. Pero en realidad kico e cifra aki ta significa pa e sector? No ta desconoci cu oficina di tursimo a bin ta haci un tremendo trabao den posiciona Aruba riba mercado como un destinacion di preferencia pa nos bishitantenan. Como e isla den caribe cu e porcentahe di mas halto den bishitantenan cu ta bolbe Aruba, pues un resultado di promocion pa ta orguyoso di dje.
Recientemente den e conferencia di World Tourism Day organiza pa oficina di turismo - ATA, varios orador a presente incluso nos Minister di Turismo actual. "Curason di nos economia ta turismo" y "E weso di lomba ta nos hendenan". Nos kier para keto un rato y pone enfasis riba e realidad actual di nos turismo. Nos hendenan, considera como e weso di lomba di nos turismo ta e sector laboral cu mas ta sufriendo pa mantene e 'curason' aki na bida. Nos kier recorda nos Minister di Turismo cu sin e weso di lomba, e curason no por sigui bati na un manera saludabel. Cu esaki nos kier pa pueblo di Aruba reflexiona y analisa cu cada trahador den e sector aki ta sufriendo door di no ta creciendo man den man cu e industria. Mas di 1 miyon turista ya caba a bishita nos isla te cu September, y mirando e datonan, esaki lo sigui aumenta drentando high-season y mas sigur sobrepasa cifranan di 2024.
E ta dificil pa un Minister di Turismo duna un expresion asina aki cu yen orguyo si nunca no a cana ni biba den e sapato di e clase trahador den e sector aki. Bishita hotelnan y 'shake hand' cu un grupo di trahador scogi strategicamente pa e propio hotel mes, pa para cla y ricibi e mandatario no ta difini cu sa kico ta e calidad di bida di esnan cu mester duna e caluroso bon bini na cada un bishitante. E dolor di un mama of tata soltero cu ta saluda cada huesped tur dia cu un sonrisa pero tras di esaki tin un tristesa financiero cu no ta alcansa pa cubri gastonan na cas y calidad di bida cu ta den decadencia.
A yega tempo pa nos por cuminsa na drecha e calidad di bida di esnan den e sector di turismo. Den e ultimo rapport di ATA (augustus 2025) por lesa cu e bishitante ta gasta un minimo di 5.250 Florin riba su estadia, cual ta un crecemento di 12.3% compara cu augustus 2024. Cuanto di e 12.3% di aumento a bay pa drecha e calidad di e clase trahador. Cuanto aumento nos trahadornan a conoce durante e ultimo añanan siendo cu nos ta mirando un crecemento stabiel di nos turismo pero mientrastanto nos por nota den prensa local cu mayoria hotel tin cupo di trabao pa ofrece, 'jobfair' na cantidad pero tanten cu no tin un solucion sostenibel pa yena e cuponan aki, hotelnan mester keda opera cu e cantidad di trahador cu tin, poniendo tambe presion riba comunidad pa importa mas trahador.
Nos Rubianonan mester keda duna e servicio amabel di semper cu nos ta reconoci p’e sabiendo cu no tin adelanto, cambio of progreso paso gran parti no conoce un aumento. Un competencia enorme entre e hotelnan pa mantene trahador ta un señal bibo cu e clase trahador kier stabilidad y un mihor calidad di bida den e sector aki, pues ta bay pa un hotel cu ta brind’e mihor salario y condicionnan laboral. Cuanto mas tin cu wanta e decadencia aki?
Partido RAIZ ta corda pueblo, cu no por trata e curason so sin tene cuenta cu e bienestar di e weso di lomba. Na cada un Rubiano y inmigrante cu a scoge pa forma parti di nos isla y ta labora den e sector di tursimo, Pabien! Y un feliz dia di turismo ainda. Keda duna semper e servicio y cordialidad cu nos ta conoci pe, esey ta haci nos e isla feliz cu ta keda yama cada un bishitante bon bini.
