Cu BBO ariba prijs di gasolin mester paga e debe cu Mike a crea
*Kico lo a pasa cu Aruba como zona economico di Vladimir Putin?
*Mike mes no por a deshaci di BBO cu pa su culpa a bira 7 porciento
ORANJESTAD(AAN)—Cu Mike no tin berguensa, ta keda demostra den e ultimo dianan cu ta entrega e prueba cu DIARIO tabata tin razon ora el a bati alarma pa loke Pueblo di Aruba mester spera di Mike Eman y loke a resta di e partido, cu den sala di Corte di Husticia a entrega prueba di loke ta nifica entrega hasta suelo di e pais Aruba, na family and friends.
Berguensa a caba sigur den e forma cu awe Mike Eman, ta trata atrobe di desacredita tur cu mester a atende cu e dolor grandi di scapa Aruba di e estado di bancarota den cual Mike Eman a bay laga Aruba, manera Hulanda publicamente a proclama ora un Pueblo Arubano sin recurso pero colma cu debe cu Mike a crea, mester a confronta e pandemia di Covid-19.
Kico contenido di e preparacion di Mike Eman y su grupo, di cual un homber condena pa Corte di Husticia na castigo di prison ta forma parti, ta, ta bira conoce pa Aruba y mundo cu mester constata cu Mike no conoce e palabranan “norma y balor”.
Dignidad politico sigur no por aproba cu awe Mike Eman ta enfrenta un Aruba, cu a pasa den dificultadnan enorme pa por mantene cabez riba awa y hasta bira ehemplo pa Reino.
Mike Eman, como parti di e Pueblo di Aruba, ta disfruta di e logronan di Gobierno Evelyn Wever-Croes den union directo cu e Pueblo di Aruba, cu awe ta paga e debe cu Mike mes a priminti cu e lo laga orguyosamente atras como herencia politica di su persona na Pueblo di Aruba.
Si a resta Mike algo di e moral cu Pueblo di Aruba merece despues di balientemente a sigui lucha pa un futuro dirigi pa e maneho actual cu mundo ta aplaudi, Mike Eman ta bin splica Aruba kico lo a pasa si su plannan cu Aruba, lo a bira realidad.
Kico lo a pasa cu Aruba, si awe Nicolas Maduro tabata socio di Aruba cu Citgo den man di Gobierno Mericano pa evita cu e socio di Mike Eman, Nicolas Maduro, lo a apodera di loke ta resta e Pueblo Venezolano?
Kico lo a pasa cu Aruba si Mike a logra cu su proyecto Citgo, cu lo a pone economia di Aruba den man di Nicolas Maduro, cu no por a dirigi ni economia di Venezuela, pasobra tanto Gobierno Mericano como Union Europeo, a introduci sancion contra Nicolas Maduro?
E posicion actual di Mike Eman enfrente Aruba ta uno bergonzoso si tene na consideracion, kico lo a pasa cu Aruba si Mike Eman por a sigui abusa di e Pueblo di Aruba cu awe mester paga a e 1,6 Miyon Florin cu Mike su partido den Parlamento, a permiti Mike uza contra regla di Ley di Contabilidad y ta uno di e motibonan cu Pueblo di Aruba a conoce aumento di prijs di gasolin y di prijs di bida pasobra mester paga restoracion financiero di Aruba, cu Mike Eman a destrui.
Cuero di cara ta tres palabra ta un palabra sumamente importante pa e Arubiano, cu a demostra na mundo, cu e ta sigui dilanti y ta lucha pa su futuro, di cual atrobe Mike Eman kier probecha politicamente manera el a haci practicamente henter su bida.
Kico lo a pasa cu Aruba si Mike a logra entrega Aruba na Nicolas Maduro na momento cu Nicolas Maduro ta partner di Putin den loke por considera un guera mundial?
Kico lo a pasa cu Aruba si Nicolas Maduro por a bira dirigente di economia di Aruba pa medio di e refineria di Aruba cu Mike kier a uza, pa gana alma di e Pueblo Arubano, cu el a destrui?
Si awe e Arubiano no por come manera e lo kier a come, ta pasobra orguyosamente mester paga e debenan cu Mike a laga atras.
Hamas Mike a cumpli cu un promesa cu el a haci na Pueblo. El a priminti cu e ta deshaci di BBO pero despues di a baha BBO na mitar, e mester a admiti cu e no por deshaci di BBO.
E maneho di Mike Eman tabata motibo cu awe Pueblo mester paga BBO den dos schakel na gasolin. E maneho di Mike Eman a laga Aruba destrui, pero Aruba a scapa di e peligro mas grandi cu tabata e posibilidad pa Aruba a bira teritorio di Nicolas Maduro, cu awe ta duna prueba di ta capaz di anexa e parti mas grandi di Guyana.
Ora mira atras mester conclui cu di 2017 pa awor, Aruba a haya tur prueba cu e tabata tin mester pa realiza kico Mike Eman realmente a nifica pa Aruba, cu el a destrui na un forma cu solamente Mike Eman por destrui pero no a logra pone den man di Nicolas Maduro y su aliado Putin.
