Prome cu crisis di Ucraine ya aumento di costo di bida tabata realidad --- *Impacto solucion structural pa maestronan riba gastonan di Gobierno --- *Aumento di prijs pa un comunidad ta afecta e aparato gubernamental
ORANJESTAD (AAN)- E situacion mundial na e momentonan aki ta sumamente serio den tur aspecto cu directamente ta mishi cu comunidad y asina tambe cu Gobierno.
Mundo tabata na haltura di suspenso na Ucraine pero e desaroyonan actual no a wordo spera ora mundo a cuminsa traha riba cifranan pa 2022 y hasta coreccion di e cifranan aki debi na e impacto di Omicron.
Uno di e resultadonan directo di e situacion di guera cu mundo ta conoce actualmente, ta aumento di prijs debi na e impacto di prijs mundial di petroleo cu ta subi y baha cu desaroyonan mundial.
Ya na 2021 e prijs di petroleo a cuminsa aumenta. Paisnan productor di petroleo sigur no ta mucho contento cu e plannan pa bandona uzo di petroleo.
Cu aumento di prijs di gasolin y otro combustibel, costo di bida a subi na mundo cu a haci cierto pronostico di su costo total sin tene na consideracion cu awe mundo por ta den un confrontacion militar internacional.
E situacion financiero di Aruba ya tabata sumamente grave. Debe Nacional y debe mara na e proyectonan PPP ya a hinca Aruba den un situacion serio y ex Ministro Raymond Knops a confirma cu Aruba tabata realmente den estado di bancarota.
Aruba a traha cifra nobo, Gobierno Wever-Croes a bini cu un maneho nobo pa Aruba cu ayudo di Hulanda por drenta futuro.
DIARIO a tuma nota di e cifranan di presupuesto, cu ta e base pa e gastonan y entrada di Gobierno pa 2022.
Cifranan cu a wordo compila pero awor mester wordo cambia, na nos parecer.
E cifranan di presupuesto no por wordo cambia sin mas ora nan wordo aproba dor di Parlamento di Aruba.
Pa cambia e cifranan cu Parlamento aproba como entrada y gasto di un pais, mester di un Presupuesto Supletorio.
Maart a habri y nos bista ta dirigi riba tur e desaroyonan mundial, cu Aruba como un parti di mundo, sigur mester vigila pasobra ta henter mundo ta wordo afecta.
Aruba ta depende di importacion di exterior. Aruba ta depende di turismo di exterior. Aruba ta depende di asistencia Hulandes na e momentonan aki.
Costo di importacion di exterior a subi drasticamente. For di fin di 2021 nos a anuncia cu esaki lo ta e realidad a base di e prolongacion di impacto di e Coronavirus nobo.
E crisis na Ucraine a bira un elemento extra y prijs di petroleo ayera tabata yega cielo.
Prijs na Aruba ta subi. Kico prijs lo haci cu turismo, den e condicionnan mundial actual ta keda un pregunta. Mas insigur mundo bira, mas grandi e menasa pa turismo.
Pero tin un asunto cu generalmente publico no ta tene na consideracion. Kico lo pasa cu e gastonan di aparato gubernamental?
Ora prijs subi pa un comunidad, e ta subi pa e aparato gubernamental tambe. Awa, coriente, tur loke un gobernacion mester pa funciona.
Con un aumento pisa di inflacion, di costo di bida, lo mishi cu situacion financiero di Gobierno?
Huez a ordena pa Gobierno busca un solucion pa cubri e 12.6 porciento cu lo a kita di maestronan. Kico lo pasa cu e resto di trahador di Gobierno?
Omicron a exigi un restructuracion mundial. E situacion di guera entre Rusia y Ucraine ta exigi un restructuracion mundial, ora e final ta conoci. Tur restructuracion mundial ta exigi restructuracion na Aruba, caminda gastonan ta sigui subi pa Pueblo y pa Gobierno tambe.
Aruba a drenta Maart 2022 decisivo pa Aruba, decisivo pa mundo.
Incertidumbre ta uno di e situacionnan mas dificil cu un empresa of pais por conoce.
E hecho cu Aruba tin un acuerdo cu Hulanda riba tereno financiero, manera ya nos a bisa den un edicion anterior, ta balsamo riba nos preocupacion grandi den un realidad mundial, cu ta mira economia internacional enfrenta uno di su pio momentonan inespera.
