Mientras mundo ta contempla menasa di clima pa su cuminda --- *Un epoca di oro a nace den e horor di Segundo Guera Mundial --- *Caida financiero mundial na momento di traspaso di fortunanan
ORANJESTAD(AAN)—2020 pa 2025 mester a marca e fase final di e traspaso historico di fortunanan di un generacion pa otro.
E cantidad di placa enorme cu e generacion di Baby Boomers a pone den circulacion durante e tempo cu nan a dirigi mundo, lo mester a culmina hustamente den e temporada actual.
E traspaso di fortuna pa medio di herencia lo a cana hunto cu cambionan economico mundial, cu mester a mira Merca y China lucha pa e prome lugar como gigante economico mundial.
Pa mira con tur e planan aki a mira luz, mester bolbe na Segunda Guera Mundial, cu a bira un realidad hororoso di historia humano.
Morto y destruccion ta marca e final di epoca di Segundo Guera Mundial, cu a habri porta pa un Epoca di Oro riba tereno financiero y economico di mundo.
Baby Boomers tabata e nomber cu a duna e generacion cu a nace despues di Segundo Guera Mundial y cu lo a construi un mundo completamente nobo cu un circulacion enorme di placa, facilidadnan nobo, avance cientifico y un era material.
E Epoca di Oro despues di Segundo Guera Mundial, a habri caminda pa desaroyo di un comunidad mundo nobo, cu exigencianan sumamente halto di un mundo cu a bira chikito y a pone placa lora.
Den e epoca aki turismo a nace y turistanan a descubri Aruba tambe ora cruceronan tabata drenta haf.
Joya, diamante, perfume, tur loke placa por a cumpra tabata parti di turismo y crecemento economico mundial, cu a conoce cambio den e tempo di crisisnan di petroleo cu a afecta Petro Dollar pero na cantidad di pais a sobrevivi.
Mundo a cambia. Cantidad di pais a bira independiente.
Oportunidad nobo pa homber y muher di tur raza na un mundo cu un populacion cu a conoce un grupo creciente di Baby Boomers cu edad cu tabata avansa y cu na caminda pa 2025 lo a entrega nan fortunanan na herederonan.
Yegando pues na un punto sumamente importante den historia humano, Covid-19 a presenta.
Mundo a basha abao pero a mustra cu e lo recupera na 2022, ora Rusia a duna continuacion na su plannan di invasion di 2014, y a ataca Ukraine.
Mientrastanto hende a realisa cu el a provoca problema serio pa clima y ya cantidad di pais ta wordo confronta cu resultadonan di un clima mas cayente cu tin resultado pa produccion di cuminda, na momento cu guera na Ukraine ta destrui e camponan cu ta produci cuminda na Rusia y Ukraine.
“Awor kico?” Esaki ta e topico mas importante na mundo, cu no tin un contesta mientras mas y mas medida ta wordo lansa den direccion di Rusia, cu ayera a haci cantidad di promesa, cu mundo no por confia.
No solamente no por confia Putin, pero te awor gueranan grandi a cuminsa, na momento cu e paisnan envolvi a firma e acuerdo di paz.
E situacion mundial ta realmente dificil. Un generacion nobo ta tuma mando di un mundo, cu un peso grandi di problema.
E placa cu a wordo produci for di final di Segundo Guera Mundial, awe mester wordo reparti. Cantidad di empresa, mundialmente ya a sinti e efecto.
Ora pone tur punto hunto, ta sumamente dificil bisa kico lo pasa.
Un cos ta sigur. Entrada pa un epoca nobo mundialmente lo ta carga cu debe cu mester wordo paga. E generacion nobo cu a hereda mundo, lo mester enfrenta problamanan sumamente grandi.
Lo mester soluciona e situacion cu ta haci cu hasta lama tin menos produccion di pisca.
Cuanto placa mundo tin pa futuro? Kico ta futuro? Pregunta y mas pregunta un generacion nobo mester contesta mientras awe mester sigui cana cu responsabilidad, planeando cada dia nobo manera e dia presenta.
Un berdad cu Aruba tambe conoce, mientras awe den sala di Parlamento mester cuminsa trata e presupuesto nobo di 2022, cu mester a cambia y sigui cambia mientras mundo tabata sigui lora rumbo pa futuro.
