Durante e aña legislativo 2022-2023 un desaroyo lo ta central
*Si Huez declara Benny culpabel, e ta keda den Parlamento?
*Benny y AVP por controla Gobierno si no por a controla DIP??
ORANJESTAD(AAN)—Manera DIARIO a trece algun siman pasa dilanti, riba e segundo Diamars di September, un aña nobo di Parlamento ta haya su inicio despues cu awe cera e aña legislativo 2021-2022.
E ceremonia cu ta marca e celebracion di e dia, no a wordo introduci pa entrega na miembronan di Parlamento e oportunidad di bisti sombre.
Como Representante di Rey, Su Excelencia Gobernador di Aruba, lo presenta na Parlamento di Aruba e plannan di Gobierno di Aruba pa e proximo aña.
Otro siman riba Prinsjesdag Su Mahestad Rey Willem Alexander, lo presenta na Staten Generaal di Hulanda e plannan di Gobierno di Reino pa 2023 manera ta bini dilanti tambe den e presupuesto di Reino.
Durante e ceremonia di 2022, tin un pregunta sinembargo cu Gobierno di e pais no por contesta Parlamento y cu ta den man di Husticia pa dicidi kico lo pasa cu un Miembro di Parlamento di Aruba, cu ta acusado dilanti Corte di Husticia na e momentonan aki.
E pregunta cu Gobierno di Aruba lo no por contesta na 2022 ta, cu si Aruba por conoce un miembro di Parlamento cu Huez ta manda prison y for di prison lo mester representa Aruba si e sentencia permiti esaki.
Si despues di eleccion 2021, Benny Sevinger por a drenta Parlamento ora el a huramenta pasobra a suspende su detencion preventivo, awor e situacion lo ta diferente.
Si Benny Sevinger resulta culpabel den e caso Avestruz, ta dificil pa durante henter temporada di gobernacion, no duna continuacion na e detencion, cu a wordo suspende pa e por a huramenta y traha (gana placa) como Miembro di Parlamento acusa di un cantidad di delito den uno di e casonan penal mas pisa cu Aruba a yega di conoce.
Si Huez declara Benny culpabel e lo mester bay prison y for di prison e lo mester traha como Miembro di Parlamento di Aruba, a menos cu Huez mes dicidi cu esaki no ta e caso.
Informacionnan di DIARIO a mustra cu lo mester a introduci guardia special pa hiba Benny Sevinger reunionnan di Parlamento y guardia mester keda presente den sala di Parlamento.
E pregunta ta keda, con cobransa di Benny Sevinger cu ta wordo paga pa su trabou lo bay. Pasobra un Miembro di Parlamento ta wordo paga pa traha pa Pueblo.
Na caminda pa e Aña Nobo di Parlamento un asunto serio ta spera Aruba cu un Miembro di Parlamento dilanti Huez.
Despues di ultimo eleccion e hecho cu e mester a huramenta a warda te na momento cu el a bandona prison pa haci su trabou.
Awor kico ta bay socede si resulta cu Benny ta culpabel?
Mester di sentencia di Huez cu mester impone cu Benny no por participa na politica durante cierto tempo y no por ocupa puestonan publico, manera den caso di otro politiconan a socede.
Mientrastanto e prome declaracionnan oficial di Benny Sevinger den su caso penal, ta preocupante si tene na consideracion cu Miembronan di Parlamento mester controla Gobierno, henter aparato gubernamental y percura pa interes di Aruba.
Nan mester studia loke pone den nan man pa nan por controla.
Dilanti Huez Benny a splica cu e tabata firma tur loke drenta pa e firma. Awor e pregunta logico ta, pakico AVP a impone riba Pueblo di Aruba pa Benny drenta Parlamento si Benny ta firma tur loke pone su dilanti, loke ta nifica cu e no ta controla ni loke DIP pone su dilanti.
Por papia aki di un miembro di Parlamento capaz di eherce control si e ta firma tur loke pone su dilanti hasta si e haya su mes den problema, manera awor ta e caso?
E aña legislativo 2022-2023 ta bira sumamente importante pa Aruba cu mester recupera di situacionnan serio cu a presenta riba plataforma mundial y cu a uni na e problemanan financiero cu for di 2014 a exigi supervision Hulandes.
Mas importante cu recuperacion financiero ta keda, e nomber di Aruba cu casonan den Corte contra politiconan na Siglo 21, a cubri cu berguensa!
