Serie di podcast presenta pa DNM ta sigui
ORANJESTAD (AAN): Despues di un temporada di vakantie e programa “Cadushi ta zona cu Dyrick” , ta bek! Directie Natuur & Milieu (DNM) ta sigui cu e serie di podcast aki cu a haya un acogida grandi.
“Cadushi ta Zona cu Dyrick” a ranca sali siman pasa cu e topico, Cambio di Clima. El a capta e atencion di hopi durante su prome periodo. E meta di e podcast tawata pa, entre-otro, educa e comunidad di Aruba riba su medio ambiente, naturalesa, conservacion di e naturalesa, herencia cultural, salubridad, nan conexion vital, desaroyo sostenibel, y mucho mas.
Diahuebs ultimo, dia 11 di september 2025 a continua cu episodio number 8 hunto cu invitado Sr. Rino Hermans, Director di Crisis Management Operations (ex BRA) y Sr. Rodney Tromp di METEO unda a elabora riba e topico “Kico cambio di clima ta nifica pa Aruba?”. E tema di cambio di clima tawata uno sumamente interesante. El a informa e comunidad con ta prepara pa cualkier eventualidad di crisis inespera. Tambe Sr. Hermans a elabora tocante, con lihe un disturbio den atmosfera awendia por transforma y bira un horcan categoria 5 den menos cu 12 ora, pa motibo di e fenomeno di naturalesa actual cu ta e cambio di clima.
E serie, “Cadushi ta zona cu Dyrick”, ta presenta door di Directie Natuur en Milieu cu e anfitrion presentador dinaminco, Dyrick Wouters, un hoben curioso y pasiona cu Aruba su naturalesa y herencia cultural cu den un forma natural ta combersa cu invitadonan. E programa ta apto pa grandi y chikito.
Hunto cu e hoben Dyrick, bo ta explora Aruba su biodiversidad, tradicion, esfuerso pa conservacion y retonan ambiental door di entrevista cu invitadonan y uzo di imagennan inspirativo.
Asina aki bo tambe ta keda na altura di Aruba su ecosistema único. Tambe siña con pa conserva nos flora y fauna y naturalesa den balans memey di desaroyo, con pa mantene un medio ambiente sano pa practica deporte, con turismo sostenibel ta beneficia Aruba y con esaki ta aporta na mantencion di nos identidad cultural, y hopi mas.
DNM ta invita comunidad di Aruba pa busca e serie di podcast pa wak of scucha.
E ta accesibel riba rednan social di DNM como tambe riba e siguiente plataformanan: Youtube, Spotify, Apple Podcast, Facebook y Instagram di DNM. Ta encurasha un y tur pa bay ‘subscribe’ na e canalnan di DNM riba e diferente plataforma menciona pa asina no perde niun episodio di “Cadushi ta zona cu Dyrick”. E fantastico di e podcast ta cu por bay scucha of wak e episodio ora ta conveni bo.
Keda pendiente pa e siguiente episodio cu lo bay den aire otro siman dia 25 di september cu un otro topico interesante asina yuda integra naturalesa y medio ambiente den cada un di nos pensamentonan.
