Despues di 20 aña Tweede Kamer e mester tin un vision awe
*Posibel dirigente nobo Gobierno di Reino a lubida Aruba?
*”Nieuw Sociaal Contract” cu Hulanda y Europa sin “De West”
ORANJESTAD(AAN)—E por a bisa cu e no ta interesa den e puesto di Prome Ministro cu e lo entrega na otro persona.
Sinembargo, si e partido “Nieuw Sociaal Contract”canta victoria den e eleccionnan na Hulanda dia 22 di November 2023, su inventor y dirigente Pieter Omtzigt, for di Parlamento lo dirigi e partido cu lo mester ta base pa e Gobierno Hulandes nobo y asina tambe pa e Gobierno di Reino, di cual Aruba ta forma parti.
Pieter Omzigt tin un historia largo den Parlamento di Hulanda y ta conoci cu Aruba.
Continuamente DIARIO a pone acento riba un asunto sumamente importante den Reino, cu hopi bez demasiado hende tin tendencia na lubida, cu e persona cu Hulandesnan Europeo eligi durante eleccion pa Tweede Kamer como dirigente di Gobierno Hulandes, automaticamente ta bira dirigente di e Gobierno di Reino bou cual Aruba ta cay.
E resultado di eleccion na Hulanda segun Statuut, directamente tin resultado pa Aruba pasobra e ta entrega Aruba como miembro di Reino, un dirigente politico nobo.
Pa e dirigente Hulandes por hiba un maneho den cual e Pueblo di Aruba como parti di Reino tambe ta haya su importancia constitucional, Aruba ta bira relevante den e programa di maneho di e partido.
“Cual ta e lugar di Aruba den e pakete cu ayera Pieter Omtzigt a entrega na momento cu el a presenta su candidatonan riba su lista pa proximo eleccion?”
Esaki ta e pregunta mas importante pa DIARIO, cu a nace na e momento historico di culminacion di e lucha di Aruba pa su Status Aparte, cu ta ocupa e punto central di e forma cu Aruba mester wordo goberna na tur nivel y loke ta wordo exigi di gobernantenan tanto den Reino como na Aruba mes.
Status Aparte di Aruba ta regla un participacion di Aruba den Reino, cu ta exigi respet pa Aruba como partner den Reino cu mes derecho cu Hulanda, pa duna expresion na e balor teritorial y di e ciudadano Hulandes, naci na Aruba.
A base di relacionnan estatal, Hulanda como pais Europeo, a drenta lazonan cu Europa cu mester a respeta e pasaporte di e Arubiano y asina Aruba den su relacionnan.
Kico e candidato Pieter Omtzigt, cu tin chens grandi pa bira e proximo dirigente di Gobierno di Reino, tin planea pa Aruba?
Ningun caminda esaki ta bini dilanti den su plannan cu ta papia claramente di “Nederland” y “Europa”, pero no di Koninkrijk der Nederlanden, cu un base constitucional cu por dicidi cu Pieter Omtzigt ta bira Presidente di e Gobierno di Reino!
E problema cu tin actualmente cu RAft ta exigi e ciudadano Arubano sigui politica na Hulanda, pasobra RAft ta splica con politiconan Hulandes por dicidi directamente cu no ta Constitucion y Leynan pa cual politiconan di Aruba a vota, ta dicidi pa Aruba.
Den e situacion mundial, nos a spera mucha mas di Pieter Omtzigt, cu ta pone nos contempla un politico, cu DIARIO a presenta na momento cu e escandalo penoso di “Toeslagenaffaire”a rementa den man di mundo politico Hulandes.
E escandalo aki a presenta prome cu Covid-19 a presenta su mes na mundo y a rementa den e tempo cu Aruba a dicidi pa un cambio politico nobo na 2017 y mester a cuminsa tuma medidanan.
Tur atencion tabata dirigi riba e desaster cu Mike Eman a laga atras y a pone Reino pone presion riba gobernacion Evelyn Wever-Croes.
DIARIO a adverti Aruba con na Hulanda Gobierno Rutte tabata na careda den porta di otro eleccion, base di e escandalo den cual servicio di belasting di Hulanda a persigui hende inocente cu a base di erornan administrativo a wordo acusa di a abusa di placa pa asistencia social.
Den e tempo aki Pieter Omtzigt a lanta para den e partido CDA y esaki te awe ta e factor di su popularidad den un situacion Hulandes di problema y mas problema, manera DIARIO ta splica.
E presentacion di Omtzigt ta papia di e intencionan cu e tin pa traha na Hulanda y Europa.
Kico e tin planea pa Aruba? Con su maneho enfrente Aruba lo ta?
E nomber di partido “Nieuw Sociaal Contract”di Pieter Omtzigt, ta papia cla di cambio cu e kier trece pa Hulanda riba tur tereno pero tambe di e hecho cu tanto existencia y contenido di su partido y e otro partido nobo, BoerBurgerBeweging, ta debi na fayo den e maneho di Gobierno Hulandes di Rutte, cu tabata mayoria di Gobierno di Reino.
Si Pieter Omtzigt gana eleccion kico lo pasa cu Aruba? E ta papia claramente di su posicion na Hulanda y Europa. Pa nos importante ta su posicion enfrente Aruba, cu ta parti di Koninkrijk der Nederlanden y no di Hulanda.
