Mester analisa informacion internacional enfrente casonan local
*Condenanan di Huez ta urgi pa mas proteccion di e votador
*Te na unda politiconan por penetra den bida priva di ciudadano?
ORANJESTAD (AAN) — Movecionnan constante den mundo politico ta entrega e prueba cu no por tene na e base cu ta cada cuatro aña tin eleccion, pa prepara pa eleccion.
Si tin un accion cu nunca ta termina, ta e esfuerzonan di politiconan pa haya mas votador pa nan partido hasta den mayoria di caso, como e meta mas importante cu nan tin den politica.
Politiconan continuamente ta ocupa cu buskeda di mas votador y cierto gruponan tin nan atencion grandi, manera sigur personanan cu no tin informacion concreto di e partidonan ni nan historia. Nos ta papia aki por ehempel di ciudadanonan nobo di Aruba cu legalmente ta haya derecho di voto.
Ora sigui e concentracion di esfuerzonan pa contacto personal cu posibel votadornan, por mira creacion di rednan politico den barionan caminda por ehempel tin mas immigrante ta biba.
Tanto hobennan cu awor ta crece na Aruba y no conoce e berdad di historia politico di e pais ainda y e grupo di migrantenan cu ta bira oficialmente parti di comunidad di Aruba y por vota, ta forma e grupo di electornan mas vulnerabel ya cu den hopi instancia ta bira victima di e sistemanan interno di partidonan pa haya votador.
Drenta cas di ciudadanonan ta uno di e peligernan mas grandi cu tin den politica pasobra e ciudadano, sigur si e no tin conocemento amplio di nos leynan y sistemanan, ta sumamente vulnerabel den mannan politico.
Durante eleccion pasa, Huez a pronuncia veredictonan cu directamente a sostene e sistema democratico y a deshaci di e sistema cu partidonan por ricibi tur informacion di un persona den forma di e registronan di voto.
Huez a deshaci di e oportunidad pa presion wordo eherce riba un votador dor di un partido, cu por bira parti di Gobierno y asina abusa di poder cu e sistema electoral ta entrega na mundo politico.
Huez a condena e forma cu e regla di voto secreto a wordo kibra dor di AVP, cu den sala di Corte di Husticia, a presenta prueba con un persona a vota, cu a wordo cualifica como acto ilegal, acto contra ley.
A reina un silencio riba e decisionnan aki mientras loke si a sigui yena aire politico, tabata scandal tras scandal.
Dos Ministro di Gabinete Mike Eman ya a wordo condena pa prison pa corupcion riba dos tereno distincto. Uno pa permiso, pa hende cu ta haci nan entrada y cu sigur un dia por bira parti di votador pa no papia mes di su famia y amigonan cu ya ta votador.
Paul Croes ta den prison pa esaki pero Mike Eman a kibra AVP, pa evita cu Benny Sevinger tambe mester biba cu e castigo di Huez.
E casonan aki ta duna prueba di corupcion, cu Ley di Eleccion mester evita y cu ta directamente mara na e forma, cu informacion personal di hende ta cay den man politico.
Control di e aparato gubernamental cu tin tur informacion di ciudadanonan, ta wordo considera actualmente como e herment mas grandi contra corupcion creciente na paisnan democratico.
E fuente pa entrega informacion valioso na politiconan por ehempel cu tin poder riba electoral si nan bira gobernante, ta servicionan di Gobierno cu tin informacionnan personal importante.
E realidad intimo di ciudadanonan por wordo pasa tambe na personanan cu ta biba di corupcion y ta haci negoshi cu compra y benta di informacion personal, cu ley a haci dificil dor di proteccion di privacidad di ciudadano.
Mundo henter ta enfrenta un situacion nobo, cu a exigi paisnan pa bini cu ekipo ultra moderno cu mester defende publico contra abuso di corupcion cu nan informacion personal.
Den investigacionnan di autoridad, e lista di canalnan pa yega na informacionnan cu ta valioso pa criminalnan, ta bira parti importante di defensa di pueblo.
E ta scapa bida di hende; e ta scapa victimanan di falsificacion; e ta scapa comunidad resultado di placa bruto cu ta wordo hinca den corupcion cu ta destrui comunidad!
