SANTO DOMINGO: Autoridadnan a bin nota, cu desde 2018 pa awor, narcotraficantenan a aumenta e uso di botonan crioyo pa purba transporta Dominicanonan ilegalmente pa Puerto Rico,
mientras cu sondi den e botonan aki tipi yola, tin miyonario cargamento di cocaina scondi.
Esaki ta pone cu ora e hendenan aki wordo gara na Puerto Rico, ademas di acusacion di entrada ilegal, nan ta wordo acusa tambe di narcotrafico. Pesey tin hopi Dominicano mes encarcela na Puerto Rico.
Por corda con na Mei 2018 mes, a gara un transporte di 601 kilo di cocaina den cual a aresta dos Dominicano.
E pandemia a yega, y cu tur restriccion, lockdown, y medida, esaki no a stop e contrabandistanan di sigui haci e viahe peligroso aki riba lama. Den ultimo 14 luna, un total di 2.721 Dominicano a wordo captura ora cu nan a trata di drenta Puerto Rico. Pero tambe tin algun cu durante e pandemia a perde nan bida riba lama. Varios boto a sink den e lama bruto aki.
Na 2020 mes, autoridad a logra di confisca 323 paki di cocaina na isla di Desecheo na Puerto Rico, unda a detene cinco Dominicano.
Na Augustus di mesun aña, a gara 591 kilo di cocaina na Rincon (Puerto Rico), y a detene 4 Dominicano. Na December a intercepta 403 kilo di cocaina, y aki a detene 2 Dominicano, 2 Mericano, y 1 Colombiano. Tur awor ta encarcela.
Awor den 2021, e viahenan ilegal a sigui y tambe botonan cu a sink. Na luna di Mei a detene 2 Dominicano cu a wordo haya cu 1.600 kilo. Na September na 25 miya nautico di Aguadilla, a detene 2 Dominicano cu 8 kilo, y e mesun luna a gara 2 Dominicano cu 250 kilo na zuid di Puerto Rico.
Na November, 3 Dominicano cu 125 kilo balora na 3.7 miyon Dollar a wordo captura riba un boto, panort di Vega Baja. Algun dia despues, a haya 400 kilo riba un boto y aki a detene 4 Dominicano.
Dia 25 di November, cu e tragedia di un boto yola cu a sink den zona di Miches produciendo 7 morto y 22 hende rescata cu bida, e luna a cera cu rescate di 47 ilegal cu tabata wantando na un boto cu a bolter. Esaki na 16 miya nautico di Nisibón.
E movimento particular: Hecho ta cu Puerto Rico di e decada aki no ta mescos cu esun di antes. Despues di sufri di dificultadnan economico, tambe e horcan di Categoria 4, y un Temblor di 6.4º riba Scala di Richter, hecho ta cu hopi Puertoriqueño ta bandonando e isla y ta bay biba na Merca.
E ta ponebo observa e movimento particular aki: Puertoriqueñonan ta bandonando e isla, y Dominicanonan ta yega Puerto Rico.
Tambe bo ta haya cu Dominicanonan ta bandonando nan isla, y Haitianonan ta yegando Republica Dominicana.
