ORANJESTAD (AAN): E tabata visible pa publico mes caba, di e caos cu tabata forma visiblemente riba Diasabra anochi durante Parada di Flambeu cu a pasa den oranan di anochi den cayanan na Playa.
Aruba cu su historia rico di Carnaval, pa hopi decada a logra acumula suficiente
conocemento, experticio, y sigur calculo mental pa esnan cu ta prepara un Bar pa core cune den Parada di Carnaval. E calculo mental pa bo tin suficiente ijs, suficiente mixers, suficiente personal, y hendenan cu sa con pa multi-task hasta ora di basha bebida.
Ta parce cu aña 2023 nos lo conoce e ‘Pandemia di Bar’, pasobra varios di nan dado momento no tabata produci nada mas di servicio, y esaki a djis crash durante parada.
Y pesey mes, despues por a lesa monton di Carnavalistanan di pura sepa, kendenan a keda asombra pa mal servicio na algun Bar y esaki a hasta duna nan temor cu awor nan no kier participa mas den otro paradanan di 2023.
Tabata un berdadero hustle pa e Carnavalistanan aki por a haya algo di bebe, pasobra ta tur hende ta aglomera rond di Bar. No tin ningun tipo di linea “queue” pa asina hende para netchi den rij pa haya algo. Pasobra otronan ta yega y cruza bo dilanti, cu beker den halto ta exigi nan bebida.
Na final di e anochi, tin participante cu no a logra haya drinks. Nan a yega te na final di e Parada di Flambeu, cu tur Bar-Tickets ainda intacto. Danki na amigonan cu nan ta topa sinta banda di ruta, cu nan ta haya cos di bebe. E participantenan a describi e asunto di Bar como un berdadero caos. E tabata asina un disgusto grandi, cu hopi di nan a sali y bandona e Parada na altura di rotonde Las Americas. Pasobra nan a sinti cu si bo keda cana den e grupo y busca forma pa yega na e Bar, e ta un situacion cu a keda bira mas peligroso.
Hopi hende a keda desapunta cu loke a pasa nan prome experiencia di Carnaval desde aña 2020. Con bin e grupo no a dedica atencion pa fix Barnan pa ta mas eficiente, fluido, y mas servicial? Pasobra Bartendernan tabata hasta zundra participantenan comosifuera ta na Kleuterschool nan ta.
Toch por a mira cu otro Gruponan a briya fabulosamente cu nan Bar. E otronan sigur tin Bar Manager cu semper ta percura pa tur cos ta up-to-date, cu suficiente ijs, suficiente mixers, y suficiente hende pa yuda. Experiencia ta lo importante aki!
