E cantante a cancela varios concierto di su Tour
NEW YORK: E cantante Justin Bieber ta pasando den un situacion dificil di salud. E cantante a cancela varios concierto, debi na un paralisis na su cara debi na un virus cu ta strob’e di move e mitar banda drechi di su cara.
“Mi tin e sindrome aki cu ta ser yama Ramsay Hunt Syndrome, y e ta un virus cu ta ataca e nervionan di mi orea y di mi cara, y ta pone cu mi cara ta keda paraliza,” el a bisa den un video cu el a pone riba Social Media, unda e ta mustra con su cara ta mustra awor.
Y ora el a haci esey, el a bisa: “Manera boso por mira, e wowo aki no ta move mes, mi no por smile di e banda aki di mira, e nanishi aki no ta move”.
E cantante a bisa cu ta trata aki di un asunto ‘bastante serio’ y a ofrece disculpa na tur fanatico. El a bisa tambe cu e tin di haci ehercicio cu su cara, y ricibi otro cuido medico pa pronto e lo ta bek riba stage.
Segun Mayo Clinic, e sindrome di Ramsay Hunt ta socede ora cu un brote di un rash tipo ‘shingles’ ta afecta e nervio di cara cerca di un di bo oreanan. E sindrome aki ta bin di e mesun virus cu ta causa bruela.
Dos aña pasa, Justin a confesa cu e ta sufri di e malesa di Lyme disease, cu ta un malesa contagioso cu bo ta haya di mordi di garpata, como tambe infeccion mononucleosis, cu ta un condicion viral.
“Mientras cu hoppi hende ta keda bisa cu e cara di Bieber ta terible, cu e ta usando droga, etc., loke nan no ta realiza ta cu recientemente mi a wordo diagnostica cu Lyme disease,” e cantante Canades a bisa dos aña pasa.
