ORANJESTAD (AAN) – Manera ta conoci, Dialuna awo, dia 20 di Juni, tabata tin e apertura di e “Job Fair-2022” (Feria di trabao), organiza pa Aruba Food & Beverage Association.
Carolina Merryweather- Raven, Presidente di e Asociacion, den entrevista cu DIARIO, a comenta tocante e evento importante aki. “Nos ta awe na Renaissance Convention Center, di 11 or di mainta te cu 8 or di anochi. Nos miembronan ta cla y nan ta bezig ta set up”, Carolina a menciona.
Tur hende envolvi den e evento tabata hopi entusiasma e dia aki, wardando tur esnan cu ta buscando trabao y cu kier a bishita e Feria di Trabao aki.
E dama a expresa cu na e momentonan aki tin hopi cupo di trabao habri riba tereno di F&B y e Asociacion ta buscando esnan netamente local, cu ta buscando trabao y esnan residente cu tin permiso pa traha, pero cu no tin trabao.
Durante e feria por haci e conexion entre esnan cu ta buscado trabao y esnan cu ta ofrece e vacatura.
Merryweather a indica cu tin algun posicion cu ta hopi popular, y cu nan ta ripara cu tin un scarcedad grandi di trahado p’e, manera tur sorto di trabao den cushina, limpieza, helper, cu ta habri aworaki cerca mayoria di e miembronan di e Asociacion.
Tin restaurantnan nobo cu ta habriendo cu mester di e staf completo ainda, esta waiter, recurso humano, y tur posicion cu por imagina tin accesible, den e Job Fair 2022.
Carolina a haya importante pa menciona cu Aruba Excellence Foundation tambe ta presente den e feria, cu nan Aruba Certification Program. Personanan cu kier sa mas di e industria di F&B. Tambe DPL ta presente y esnan cu no ta registra ainda, nan por hacie durante e Job Fair.
“Hopi di nos miembronan ta den contacto cu DPL, y semper nos ta purba wak kico tin accesible den nos mercado local, prome cu nos tin e necesidad di busca na otro caminda”, Carolina Merryweather- Raven a duna di conoce.
El a menciona tambe cu tin 50 studiante di Colegio EPI cu a wordo invita na e Feria di Trabao. Di parti di DPL, e Asociacion sa cu tin hopi persona ta buscando un trabao y nan ta desea di por yena e vacantenan cu tin despues di e Job Fair, awe. Si no logra, Carolina a señala, nan lo sigui traha riba incentivonan.
