ORANJESTAD (AAN): Jeugdgezondheidszorg (JGZ) of tambe yama Cuido Salud Hubenil ta un seccion hopi importante di Departamento di Salud Publico (DVG).
JGZ tin e tarea publico pa maneha y supervisa e area di salud y bienestar di tur hoben di 0-25 aña di edad na Aruba.
JGZ ta consisti di un team multidisciplinario di profesional cu experticio amplio riba tereno di salud y bienestar di baby, mucha y hoben. E team ta consisti di dokternan, enfermeronan di scol, dietista, orthopedagogo y cu sosten di un trahado administrativo.
JGZ tin como meta principal promove, proteha, monitoria y mantene salud y bienestar general di tur hoben na Aruba. Asina tur hoben por crece y desaroya den un forma saludabel den nos comunidad. E meta ta basa riba e principionan di World Health Organization (WHO), tratado Internacional di derecho di mucha: articulo 24 y e Sustainable Development Goals (SDG # 3).
JGZ ta brinda maneho y servicio den forma di cuido integral di salud, cuminsando for di baby y ta sigui te cu adolescencia. Den e trayecto aki ta samina y supervisa e hoben su salud y su bienestar total. Esaki ta encera salud fisico, mental y emocional, tambe e ambiente en general cu e hoben ta crece aden, caminda e rol di mayor/educador ta uno clave y tambe e sorto di cuido cu e hoben ta of mester haya. Asina JGZ ta colecta informacion (dato) tocante e hobennan y cu colaboracion di diferente sectornan cu ta duna cuido (manera salud, enseñansa, social, husticia, deporte etc.), por haya un bista di diferente factor cu por tin influencia riba e estado di salud y bienestar di e hobennan.
Unda ta nesesario, JGZ ta ahusta su maneho pa e continuidad den cuido pa e hobennan na Aruba cu lo contribui na “One healthy and happy Island!”.
Nos slogan ta: ”Promove y proteha salud y bienestar trempan pa un miho mayan!”
Awo cu bo sa mas di JGZ, den nos siguiente edicion nos lo elabora mas riba e trabounan, colaboracion cu stakeholders y lo presenta resultado di nos saminacionnan (onderzoeken) cu ta resalta mas den e diferente areanan di salud y bienestar cerca e hobennan.
Keda pendiente pa informacion valioso!
