Encuanto Elektronisch Kinddossier...
ORANJESTAD (AAN): Recientemente Jeugdgezondheidszorg (JGZ), seccion di Directie Volksgezondheid (DVG) a duna na directiva di AZV un presentacion referente e trabounan di JGZ y e sistema di registracion “Elektronisch Kinddossier” (EKD) cu actualmente ta den desaroyo y pronto lo bira operacional.
E meta di e presentacion tabata pa AZV como un stakeholders crucial, haya e informacion necesario pa den futuro e instancianan por colabora cu otro.
Sra drs. Janice Essers-Hooft, hefe suplente y dokter di JGZ, acompaña pa coleganan di JGZ y seccion Beleid di DVG, a elabora ariba e maneho y tareanan legal di JGZ.
E meta principal di JGZ ta pa promove, proteha y salvaguardia e salud y bienestar di tur mucha y hobennan aki nan Aruba, desde nacimento te cu nan adolescencia (0-25 aña). Un di e tareanan importante ta pa examina y vigila e grupo di meta.
E introduccion di e sistema EKD na JGZ lo yuda no solamente pa saca data relevante di e salud y bienestar di e grupo di meta, pero tambe lo genera data di e cuido indica pa e muchanan/hobennan cu mester di dje. Adicionalmente Wit Gele Kruis lo haci uzo di e EKD (muchanan 0-4 aña), den estrecho colaboracion cu JGZ.
Durante e presentacion a toca e tematica di con dato for di EKD riba termino cortico of largo plaso por duna un bista di e desaroyonan of “trends” den e sorto di cuido pa e muchanan/hobennan. Algun ehempelnan ta, ariba e area medico, e sorto di cuidonan cu ta wordo cubri of no y e parti di lista di espera pa haya e cuido indica y adecua.
Esaki lo stimula e colaboracion entre JGZ y AZV pa por intercambia tocante maneho y gastonan di cuido pa e grupo di mucha/hoben di (0-25 ana).
En general, e idea ta pa conhuntamente inventarisa e muchanan/hobenan cu ta segura cu AZV of no y atende cu esaki apropadiamente den e diferente areanan di cuido manera, medico curativo, paliativo, rehabilitacion y crucialmente den e area preventivo.
E tabata un presentacion hopi agradabel y informativo. JGZ lo sigui mantene nan trabounan pa promove, proteha y interveni trempan pa e salud y bienestar di tur mucha y hoben na Aruba den colaboracion cu stakeholders. Na final JGZ y AZV a palabra cu lo tin mas encuentro pa atende e puntonan di atencion.
