ORANJESTAD (AAN): Tabata den fin di siman, cu varios turista cu ta semper vigila prijs di pasashi for di area di Newark (New Jersey) non-stop pa Aruba,
a bin nota cu diripiente den 2023, e aerolinea jetBlue lo no bula mas pa Aruba direct. Bo por bula si pa Aruba pero via di otro ruta.
Nan a nota cu e vuelo diario non-stop entre Newark y Aruba a wordo elimina for di e sistema di reservacion, pues tur hende cu ya a haci reservacion pa 2023 usando e ruta aki, tin di bay check nan reservacion.
Aparentemente jetBlue ta prefera di pone tur recurso di nan vuelo den nan hub na JFK Airport na New York City.
Pero a sali na cla, cu en total jetBlue a haci un monton di cambio, y a cancela un total di 37 vuelo existente. Esaki tin 2 cu ta afecta Aruba, esta vuelo di Newark (New Jersey) direct pa Aruba. Tambe e vuelo di Fort Lauderdale (Florida) direct pa Aruba.
A sali na cla cu jetBlue a introduci e cambionan aki durante fin di siman. Y Aruba no ta e unico isla den Caribe cu a perde vuelo.
Na Merca, e dos Aeropuertonan cu a haya golpi mas duro ta di Newark (EWR), y tambe Fort Lauderdale (FLL).
jetBlue a declara via un boletin, cu e cortamento di vuelo ta diseña pa sigura stabilidad operacional di e aerolinea. Pero jetBlue ta usando e palabra ‘suspension’ di e vuelonan ey. Pa evita dolor di cabez operacional, nan ta reduci ruta y bulando menos, pa asina por stabiliza nan operacion.
Vuelonan cancela: Segun jetBlue, for di Aeropuerto di Newark, nan ta cancelando vuelonan non-stop pa Aguadilla (Puerto Rico), Aruba, Atlanta, Austin, Charleston, Jacksonville, Los Angeles, Montego Bay (Jamaica), Nassau (Bahamas), Phoenix, Providenciales (Turks & Caicos), Puerto Plata (Rep. Dominicana), Raleigh-Durham, San Diego, San Francisco, St. Lucia, y St. Maarten.
For di Aeropuerto di Fort Lauderdale, nan ta cancelando e vuelonan pa Aruba, Cartagena (Colombia), Chicago, Cleveland, Grand Cayman (Cayman Islands), Philadelphia, Phoenix, Providenciales (Turks & Caicos), Port of Spain (Trinidad & Tobago), Portland, Seattle, y St. Maarten.
Bo por sigui bula non-stop for di Newark pa Aruba cu e.o. United Airlines. Pero si bo kier bula cu jetBlue, bo tin di haci algun conexion prome cu bo yega.
