Despues di 18 aña di servicio:
ORANJESTAD (AAN) – Debi cu Jeffrey Matos a haya otro reto den su carera profesional, y ta bay biba den exterior cu su famia, el a despedi como director di Club Kibrahacha.
Den entrevista cu Matutino DIARIO, el a expresa cu el a tuma e reto nobo aki y ta bay p’e.
“Enberdad mi a traha casi 18 aña den Kibrahacha, unda el a duna hopi di su parte pa loke ta trata e adultonan mayor na Aruba, y e satisfaccion cu e ta bay cu ne, despues di 18 aña, ta contribui cu nos adultonan mayor.
Mi ta mira hopi desaroyo nobo y positivo pa cu e grupo. Nos no a yega ainda unda nos kier ta, como pais, como isla, pero mi ta kere cu, como organizacion Kibrahacha, nos tambe ta forma parti di e totalidad.
Nos ta haciendo nos maximo esfuerzo y nos a logra hopi cos den e ultimo añanan, y por wak e desaroyonan den Club Kibrahacha”, Matos a reitera.
Jeffrey Matos a bisa, explicitamente, cu e logronan den e club no ta pasobra el a haci esaki, sino door di trabao den grupo. “Mi ta hopi gradici na e team, na e directiva di Kibrahacha, na Rotary, na gobierno, y sigur na e boluntarionan cu a yuda pa Club Kibrahacha ta awe unda e ta como organizacion.
“Mi ta kere cu mi ta laga un organizacion hopi satisfecho y sigur cu logronan, cu hopi trabao cu lo por, y mester, wordo haci, pa adultonan mayor na Aruba.
Mi ta bay cu hopi satisfaccion y convenci cu e team di trabao y e grupo di boluntarionan y e organizacion cu nos tin, mi ta kere cu Kibrahacha lo bay haci hopi mas den e añanan nos dilanti”, señor Matos a subraya.
