ORANJESTAD (AAN): E dianan aki, DIARIO ta enfoca riba tur e empleadonan local den mundo di turismo, cu a sobresali durante 2023 y cu recien a ricibi un tan codicia ‘AHATA Excellence Award’ durante un anochi di gala.
Uno di esnan cu a gana premio ta Janice Rasco Cater. Janice ta un waitress na Embassy Suites Aruba Resort.
El a wordo honra cu e premio di AHATA Excellence pa su servicio excepcional na huespednan, y su impacto positivo consistente riba tur demas colega na trabao.
Pesey mes, tin di manda palabra di gratitud na Janice pa e forma con e ta comparti su entusiasmo y energia positivo, y di ta un inspiracion pa tur demas personanan trahando den mundo di horeca.
