Segun Carolina Thiel Span:
ORANJESTAD (AAN): Continuidad di cuido medico importante y ta nombra den ley. E ley di calidad di cuido ta e ley cu Inspeccion di Salud Aruba (IVA) ta traha cu ne pa salvaguardia e calidad di cuido. Señora Carolina Thiel-Span di IVA a remarca cu despues di Covid, problemanan di salud mental a aumenta y a pone un presion hopi grandi riba e veld di cuido mental y a causa cu no por salvaguardia e continuidad di e cuido pa pashentnan. Tambe, e stagmentacion di pago ta contribui na esaki pa motibo cu no ta tur hende tin placa pa paga pa servicionan.
El a remarca cu ora un persona tin pregunta y necesidad, y yega cerca sea na un docter di cas of un professional priva, esakinan ta sigui nan normanan di calidad segun e diagnostico, pa asina e persona aki haya e cuido necesario.
Segun el a indica, tin casonan lamentable cu ta pasa den noticia pero tambe ciudadanonan y instancianan por contacta IVA pa entrega keho. Di aki ta sigui un investigacion pa wak si e continuidad di cuido di e ciudadano a wordo salvaguardia y si e cliente ta na e luga corecto unda cu e mester ta. Esaki ta rekeri traha hunto den un forma structura.
Señora Thiel-Span a remarca cu IVA tin un trayecto pa casonan individual. Den website di IVA por haya e maneho di melding pa profesionalnan y tambe tin un structura pa un persona entrega keho di e cuido cu el a haya. Tambe IVA tin e mandato via ley cu si algo indesea den cuido pasa, por ehempel morto, e profesional tin e deber pa meld cerca IVA. Y di aki lo bin investigacion pa determina kico por a bay miho y haci cambionan sistematico.
