Despues di 16 aña:
ORANJESTAD (AAN): E esfuersonan structural pa logra un areglo di disputa (geschillenregeling) pa e paisnan denReino a drenta un fase decisivo. Durante e reunion Tripartiet na Hulanda, Parlamentario Edgard Vrolijk ta indica cu e delegacion di Aruba, Corsou y Sint Maarten a logra avancenan significante, mustrando un cooperacion solido cu e meta pa cera un discusion cu tin ya caba 16 aña sin un solucion definitivo.
Parlamentario Edgard Vrolijk como e trekker di e ehecucion aki pa Aruba, a califica e reunion sumamente fructifero. E debatenan a duna espacio pa revisa e ultimo consehonan cu a drenta y evalua e camindanan proponi door di e islanan ruman, specialmente e propuesta treci padilanti door di e delegacion di Corsou.
Un pilar fundamental den e trayectorio aki tabata e conseho legal ricibi for di e Departamento di Asuntonan Juridico (DWJZ) di Aruba. Cu e basesnan aki stableci, e parlamentarionan a duna instruccion awor pa e propuestanan wordo asina revisa door di e departamento di DWJZ corespondiente na Corsou y Sint Maarten.
E siguiente paso den e strategia constitucional aki lo ta e creacion di un petit comité (un comision chikito y specialisa). E grupo aki lo tin e encargo di sinta structuralmente pa formula e draft (e voorstel) final, integrando e feedback di e tres islanan.
E meta principal y final di e comision aki ta pa hunto saca un documento diki y solido pa wordo entrega oficialmente na Tweede Kamer na Hulanda.
“Garantisa un consensus entre tres pais cu tin biaha tin pensamentonan legal of politico diferente, no tabata un trabao facil. Sinembargo, e delegacion Arubano a resalta e boluntad pa yega na otro, logrando un 'samewerking' (cooperacion) ehemplar dentro di Reino”, Edgard Vrolijk a enfatisa.
A pesar di e diferencianan di opinion inicial, e debatenan a cana semper den un ambiente di respet mutuo y cu un solo bista fiho riba e meta comun: duna e islanan Caribense un instrumento constitucional husto y legal despues di mas di un decada di speransa.
----
