MARIGOT: E bahia di Cul-de-Sac na e parti frances di St. Martin e siman aki a worde afecta pa un fluho masivo di yerba di lama Sargassum,
cu a cubri casi henter e bahia for di pariba te pabao. Resulta di esaki ta cu autoridad a declara cu e isla chikito conoci como Pinel Island ta worde cera te cu proximo aviso, pues pa awor e Ferrynan no ta funcionando.
Un capitan di Ferry a bisa cu pa awor nan ta sin trabao, y nunca el a yega di mira algo asina den 47 aña. Gobierno di St. Martin ta wardando mas equipo yega pa asina trata na saca e Sargassum aki. Nan a mira un Backhoe trahando na comienzo di siman, y cu a bin di un compania na Guadaloupe.
Pa locual ta trata e tema di fluho di Saragassum na nivel internacional, UNEP- CEP (United Nations Environment Program- Caribbean Environment Programme) a emiti un relato pa yuda organizacionnan cu formulacion di e maneho cu ta referi na fluho di Sargassum.
E problema mas grandi ta e presencia y holor desagradable di e yerba di lama na costa por afecta esunnan cu bishita lama.
E piscadornan cu ta pisca na canto, como esnan cu ta pisca for di boto tambe mester ta alerta cu e presencia di yerba di lama y con esaki por afecta nan piscamento. E liñanan di pisca ta bira mucho mas pisa pa ranca y esaki por kibra.
Pa e motornan di boto tambe esaki por obstaculisa su funcion. Ta di remarca cu esaki ta un fenomeno relativamente nobo (2011) y cu no tin un maneho estableci ainda pa tuma decisionnan. Pa duna informacion obhetivo di e situacion temporal mester haci mas investigacion cientifico pa conclui kico ta e causa y e efectonan di presencia di yerba di lama.
Pesey mes tur Ferry pa Pinel Island a wordo cancela. Deporte Aquatico tambe ta paraliza pa awor na St. Martin.
