ORANJESTAD (AAN): Iron Order Motor Cycle Club Aruba ta un grupo di coredornan di Harley cu ta basa su mes na riba hermandad, pasa tempo cu famia y mas importante ta duna bek na comunidad.
Ta asina cu e aña 2025 Iron Order MC a cumpli 10 aniversario, y na luna di April ultimo a organisa un ride pa varios otro grupo di Harley a participa y a contribui na e ride aki. Cu e fondonan genera Iron Order MC a scoge e tema di prevencion di cancer di prostaat como punto di atencion.
Ta conoci cu e tema aki ainda ta un taboo den sociedad y pa cu salud di hende homber e ta un di e menasanan mas grandi.
E importancia di screen na tempo ta pa prevencion y deteccion na tempo di tur tipo di cancer y pa e poblacion di hende homber, en particular e cancer di prostaat. Iron Order MC no solamente a hacie pa e mundo di bikers pa conscientisa e populacion completo y en particular e hende homber di Aruba.
Fundacion Contra Cancer di Prostaat (FCCP) su obhetivo nan ta inclui (1) duna informacion y conscientisa pueblo di e malesa y con pa atend’e cu ne na tempo, (2) tambe colabora cu otro instancianan durante e “charlanan den bario”. Relevante pa tin un mihor calidad di cuido y bida pa e hendenan diagnostica cu cancer di prostaat, (3) ofrece contacto cu otro pashentnan, duna informacion y testimonio di pashent na pia di trabao, radio y television, y na e pashent individual y su famia.
Ta nota cu practicamente tur miembro y sostenedor di FCCP ta “sobreviviente di cancer”. Otro nan tin miembronan den seno familiar cu a sufri di cancer di prostaat.
Bo tabata sa cu si bo tin cancer den famia, e chens pa bo hay'e ta dos pa tres biaha mas halto.
Prostaat ta den e top cuatro cancernan diagnostica na Aruba. Y bao di hende homber, e incidente di cancer di prostaat ta di e di dos tipo di cancer mas halto na Aruba.
E incidente, pues casonan nobo diagnositica pa aña, di cancer di prostaat na Aruba tin un tendencia di crecemento. Dato nan disponibel ta indica cu e averahe di cancernan di prostaat diagnostica pa aña na Aruba durante e periodo di 2013 pa 2016 tabata cerca 63. Den e periodo di 2017 pa 2022, e averahe aki a subi significante na 137 caso nan nobo diagnostica pa aña.
Cancer di prostaat ta un tipo di cancer cu, por lo general, ta desaroya relativamente poco-poco. Ta socede cu no ta sinti mucho molester of dolor te ora cu e ta den un fase avansa. Generalmente, mas trempan e cancer di prostaat ta wordo diagnostica, mas grandi ta e probabilidad ta cu e hende homber ta ser trata cu exito. E tasa di sobreviviencia di cinco aña pa cancer di prostaat diagnostica y trata na tempo, ta surpasa 95%. Un cu otro dependiendo si e cancer ta limita na e prostaat (localisa), ta regional, of a plama na otro organo den curpa di e ser humano nan mas distancia di e prostaat, y su agresividad.
Un checkeo anual lo ta determinante pa detecta na tempo y biba un bida liber di e cancer. Ta recomemda pa hende hombernan di descendencia Africano y Caribense pa cuminsa screen via PSA test na e edad di 40 aña caba cerca bo dokter di cas. Esaki teniendo na cuenta cu e incidencia relativamente mas halto bao di e poblacion aki compara cu otro nan, cual ta recomenda un screening anual desde e edad di 50 aña.
Manera cu e prome president di directiva di FCCP, Rudy Rodriguez, a bisa: “Ami tabata laat, mi no kier pa otro ta!”.
Iron Order MC y FCCP sigur ta gradici tur e clubnan di bikers cu a participa y contribui na e causa aki y tambe e famia grandi di Iron Order MC. Tambe kier gradici e gruponan di colaboracion, Koningin Wilhelmina Kanker Fonds, Mary Joan Foundation y Fundacion ABO pa conscientisacion di cancer na e comunidad di Aruba. Hunto nos por trece e mensahe con importante screening preventivo y deteccion na tempo ta.
