Fergino Brownbill -President Parlamento Corsou
ORANJESTAD (AAN): “Pa Corsou, union y colaboracion semper ta e enfoke cu mester tin den paisnan den Reino”, asina e Presidente di Parlamento di Corsou, Fergino Brownbill a enfatisa durante un entrevista despues cu e reunionnan di Ipko a termina diadomingo ultimo.
Segun el a expresa, Ipko 2026 a enfoca tambe riba e colaboracion na unda cu un di e puntonan importante di e lista di palabracion tabata pa fortifica e Ipko aki y pa su impacto pa nos ciudadanonan por ta mas grandi.
Segun e presidente di Parlamento di Corsou, Reino tin prioridadnan comun, entre otro embehecimento, desaroyo geopolitico. Esakinan ta algun tema cu e paisnan den Reino tin den comun na unda por tin diferencianan pa cada pais. Segun e, ta temanan cu ta hala nos mas cerca di otro, y ta crea oportunidadnan pa colabora cu otro tanto entre e parti di Caribe como cu Hulanda.
Parlamentario Brownbill a enfatisa, no ta pasobra tin mesunnan limitacionnan, e solucionnan mester ta mescos. Si Hulanda, pa motibo di embehecimento kier subi edad di pension, no necesariamente demas pais mester haci esaki. Pero si, cada pais mester siña di otro, y wak con cada pais ta atende cu e temanan en comun, y adapta e solucion segun e necesidad di cada pais. El a agrega cu na Corsou, hisa edad di pension den e caso aki, no lo ta e direccion cu nan kier bay.
“Esaki ta e meta di Ipko, pa wak con demas pais ta atende cu problemanan comun, y adapta maneho aki den e manera cu lo sirbi nos comunidadnan”, el a expresa.
