ORANJESTAD (AAN): “The Influencer Teacher”, esaki ta e tema di Instituto Pedagogico Arubano (IPA)
su open dag 2025 cu lo tuma luga diasabra 1 di februari di 10:30 am - 1:30 pm na IPA (Isaac Wagemakerstraat 11, San Nicolas).
Riba e dia aki IPA ta habri su portanan pa tur persona cu kier descubri mas di e rol crucial y e influencia grandi di maestro den enseñansa.
Durante e open dag nos lo duna informacion di diferente estudio:
- e estudio pa Maestro di Enseñansa Primario,
- e curso di Certificacion Pedagogico Didactico (PDG),
y e dos trayectonan cortico pa maestronan cu actualmente ta trahando caba den scol preparatorio of scol basico pa nan por amplia nan cualificacion cu sea:
- e trayecto cortico pa Maestro di Enseñansa Primario cu ta hiba na un autorisacion pa duna les na tur alumno di scol preparatorio y scol basico of
- e trayecto cortico pa maestro specialisa di Hulandes y Ingles pa Enseñansa Primario
Tuma nota cu cada estudio tin su grupo meta y orario specifico pa por haya informacion:
Estudio pa Maestro di Enseñansa Primario
E estudio pa Maestro di Enseñansa Primario ta forma maestro cu ta cualifica pa duna les na alumno di scol preparatorio y scol basico. Durante e open dag lo tin 2 sesion cu e bishitante lo por atende pa ricibi informacion di e estudio. E orario di sesion 1 ta 10:45 am y di sesion 2 ta 11:30 am.
Pa e estudio aki lo brinda the ‘whole experience’. E bishitantenan lo participa activamente na actividad cu nos docentenan di diferente area di formacion (Matematica, Arte, Idioma y Comunicacion y Pedagogia) a prepara pa nan. Lo clausura e experiencia aki cu un presentacion di informacion general.
Pa inscribi pa e estudio aki mester tin diploma di havo, vwo of mbo nivel 4 (of ta den examenklas di un di esakinan).
PDG
PDG ta un curso pa profesionalnan cu ya caba ta dispone di un diploma riba nivel di bachelor of di master y cu kier continua nan carera den ramo di enseñansa.
Pa medio di e curso di PDG e profesionalnan por desaroya competencia pedagogico y didactico. E orarionan cu bo lo por ricibi informacion general di e estudio aki ta sea 10:45 am of 11:30 am.
Trayecto cortico pa Maestro di Enseñansa Primario
E trayecto cortico pa Maestro di Enseñansa Primario ta un estudio specialmente desaroya pa maestronan cu ta trahando caba den scol preparatorio of scol basico y cu actualmente ta autorisa pa duna les na alumno di edad 4 - 8 aña of 6 - 12 aña. Cu e estudio aki nan por amplia nan autorisacion pa asina nan ta completamente cualifica pa duna les na alumno di 4 te cu 12 aña. E orario di sesion 1 ta 10:45 am y di sesion 2 ta 12:00 pm.
Trayecto cortico pa Maestro Specialisa di Hulandes y Ingles pa Enseñansa Primario
E trayecto cortico pa Maestro Specialisa di Hulandes y Ingles pa Enseñansa Primario ta un estudio specialmente desaroya pa maestro cu ta trahando caba den scol basico y cu actualmente ta autorisa pa duna les na alumno di 6 - 12 aña. Cu e estudio aki nan por amplia nan autorisacion pa asina nan ta cualifica pa duna les di Hulandes y Ingles na alumno di klas 1 te cu klas 6 di scol basico. E orario di sesion 1 ta 10:45 am y di sesion 2 ta 12:00 pm.
Benta di pasaboca
Nos studiantenan di aña 3 di e estudio pa Maestro di Enseñansa Primario lo t’ey presente cu benta di pasaboca. Meta di esaki ta pa recauda fondo pa nan pasantia internacional cu ta forma parti di e curiculo di nan estudio.
IPA ta invita henter comunidad di Aruba, specialmente tur persona cu ta interesa pa haci un estudio na IPA pa asisti na nos open dag. Probecha di e oportunidad pa haya tur informacion personalmente y haci pregunta.
