Jennifer Warner cu informacion interesante:
Instituto Pedagogico Arubano, manera den tur ocasion anterior, tabata presente durante College Fair 2024. Jennifer Warner (encarga cu informacion, comunicacion y PR di IPA) a representa e Instituto hunto cu algun colega cu ta sostene e diferente departamentonan di IPA, y algun studiante.
Den combersacion cu Seccion Hubentud den Movecion, el a mustra hopi contento y satisfecho cu e interes y acogida grandi for di studiantenan tabata tey, pa IPA. Entre 11’or di mainta cu 1’or traimerdia, den e dia di apertura, tabata tin un grupo grandi di studiantenan di Colegio Arubano, cu a haya hopi informacion di IPA. Ademas hopi alumno cu ta na MAVO ainda a acerca pa busca informacion y haci pregunta, por ehemplo cual ta e estudio cu Instituto Pedagogico ta bay ofrece e Aña Academico venidero y cual ta e rekisitonan cu mester cumpli cu nan pa por drenta IPA, y unda pa haya informacion fuera di College Fair.
Un manera di duna informacion pa atrae e studiantenan, tabata atravez di weganan educativo unda e studiantenan por a experimenta, en corto, kico tur ta wordo duna na IPA. Asina Warner a duna di conoce na e seccion aki.
“Nos a bin cu esaki specialmente pa haci e estudio mas atractivo, pa nan wak cu IPA no ta solamente literatura, pero cu tin cosnan educativo y recreativo cu ta hala atencion di nos studiantenan, cu den futuro lo bira maestro, y kico nan por uza como tools pa por capta y sondea alumnonan”, Jennifer Warner a splica. E hoben a indica cu e unico estudio cu IPA ta ofrece tur aña y actualmente, ta pa maestro di enseñanza primario, pero dependiendo si tin tekort di maestronan den cierto materia, e ora ey IPA ta haci peticion na gobierno pa ofrece e estudio p’asina nan tin docentenan specializa. IPA tin un grupo grandi di maestronan specializa den Educacion Fisico, forma na IPA, cu ta parti den diferente scol, pero nan no ta habri opleiding si e momento ey no tin e necesidad, Jennifer Warner a señala.
