Christel Choennie splicando di e evento di Ambulans
ORANJESTAD (AAN): Muchanan na Aruba un biaha mas lo tin un oportunidad unico pa pasa un dia yen di diversion, educacion y experencianan practico durante Children’s Experience Day, un actividad special organiza pa ImSan pa pone muchanan mas cerca di mundo medico y emergencia den un forma accesibel y entretenido.
E evento lo tuma luga dia 23 di mei na Renaissance Convention Center, for di 9 or di mainta te 2 or di atardi, y entrada ta completamente gratis.
Segun verpleegkundige riba Ambulance, Christel Choennie, e actividad ta enfoca riba duna muchanan un experencia interactivo unda nan no solamente ta mira, pero tambe ta participa activamente. Un di e atraccionnan principal lo ta e oportunidad pa muchanan mira un ambulance di cerca y conoce con e ekipo di emergencia ta traha.
Ademas di esey, muchanan lo por bisti e paña di ambulance, saca potret den uniform y participa den un CPR Challenge, unda paramediconan lo siña nan, riba un nivel adapta pa muchanan, con pa reacciona den caso di emergencia y e basiconan di CPR.
Diferente paramedico tambe lo presenta demostracionnan practico pa duna e muchanan un bista den e trabao importante cu personal di emergencia ta haci tur dia pa salba bida.
Pa haci e dia ainda mas special, e prome 200 muchanan cu yega lo ricibi un ‘goodiebag’, ademas di snack y algo pa bebe.
Choennie ta describi e evento como un experiencia “extremadamente leuk” cu ta combina diversion cu educacion den un forma apropia pa muchanan.
Organizadornan ta encurasha famianan pa yega trempan, pasobra esey lo aumenta e oportunidad pa participa den tur actividadnan y disfruta di e experiencia completo. Importante pa sa ta cu no tin necesidad pa registra cu anticipacion; simplemente yega y disfruta.
