Dennis Burke, presidente:
ORANJESTAD (AAN) -- Manera a bin dilanti caba, den e conferencia di prensa yama pa Departamento di Asunto Social y Centro di Bario Playa Pabao, nan ta organizando un evento interesante, pa celebra Dia Mundial di Famia, Diadomingo proximo, 15 di Mei.
E Presidente di Centro di Bario Playa Pabao, señor Dennis Burke, a elabora tocante e programa cu lo bay tin Diadomingo awo.
Burke a duna di conoce cu dos siman pasa el a wordo acerca door di Departamento di Asunto Social (DAS), pa nan hunto cu Centro di Bario Playa Pabao, celebra e Dia Internacional di Famia, locual nan a acepta.
El a comenta cu Centro di Bario Playa Pabao, den pasado, pa Dia di Mucha y Dia di Hende Muher, tambe a cuminza cu DAS, y aworaki, pa basta aña caba, nan ta riba nan programa anual. Burke a expresa cu e aña aki e no ta priminti cu esaki ta bay, pasobra e programa di e Centro di Bario ta hopi druk durante e aña.
“E actividad pa e celebracion di Dia Internacional di Famia, lo tuma lugar Diadomingo 15 di Mei, na Centro di Bario Playa Pabao, den horario di 10 or di mainta pa 3 or di atardi. Durante henter dia 15 instancia lo ta presente y lo brinda informacion na e famianan local. Di 10 or di mainta pa 2 or di atardi, lo tin diferente wega di famia, pustamento di fly, cu lo ta entre 10 cm pa un meter. Como cu ta Dia di Famia nos lo kier wak e famia tambe traha hunto”, señor Dennis Burke a menciona.
El a splica cu pa e motibo aki nan ta pidi pa e flinan cu wordo subi door di e mama, mientras tanto un yiu mester jop’e. Lo tin wega di domino, cu ta net diferente. Burke a splica cu nan mester di un tata y un yiu cu lo participa. Esun cu perde, lo cay afo. Pa 11.30 or lo tin un hersengymnastiek. E ta pidi pa esnan cu kier participa, pa forma grupo di cinco persona y tambe por inscribi na Centro di Bario Playa Pabao di mainta 8’or pa atardi 5’or.
Tin charla educativo ofreci door di Tienda di Educacion. Di 2 pa 3’or di atardi tin un show cu gruponan hubenil. Bar y cushina lo ta bon surti. Door cu tin mucha presente lo no tin bebida alcoholico.
Dennis Burke a gradici CEDE Aruba pa su gran colaboracion financiero, pa por haci e actividad aki posible. Un invitacion ta bay pa henter pueblo, Diadomingo cu ta bin, 15 di Mei, Dia Internacional di Famia.
