Stagiaire na DHM haciendo esaki
ORANJESTAD (AAN) Sue-Ann Ras, lider di Proyecto Codigo di Proteccion, a sigui splica den entrevista cu DIARIO, cu aña pasa a bin cu un tipo di “Try Out” unda cu Departamento di Mucha y Hoben a subi riba caya, na cuminzamento di parada, y a cuminza wak kico nan ta haya pa cuminza obtene dato y wak di cuanto mucha den evento di carnaval, nan ta papiando di dje.
“Na principio nos a hacie conhuntamente cu Buro Slachtofferhulp, e tabata tin un par di stagiaire cu a yuda nos, y tabata asina dificil pa por midi pasobra tin asina tanto mucha den parada, como mucha na banda. Anto na dado momentonan no por a sigui ni conta nan di tanto cu nan tabata mira y e casonan cu ta varia”, Ras a señala.
El a agrega cu, basa riba esey, na dado momento nan a sinta y nan a bisa cu nan mester bin cu un investigacion cu nan por haya na dato, y nan por purba compronde kico ta pone e mayornan toch tuma e decision di bay cu nan yiunan di cero pa cuater of cinco aña, na eventonan cu ta largo.
“Anto, basa riba esey, e mesun stagiaire cu a hacie aña pasa hunto cu nos y Buro Slachtofferhulp, nan a purba di saca dato cuanto muchanan nan ta hayando. El a bin cerca nos core stage aworaki, anto e ta bay haci investigacion riba e conocemento di tur e percepcion di mayornan, relaciona cu e factornan di riesgo pa mucha, di edad di 0-5 aña tin na e eventonan di carnaval na Aruba y e ta haya dato. Esaki ta bira su tesis final”, Sue-Ann Ras a señala.
El a agrega cu e stagiaire ta bay bin tambe cu sugerencianan y awo nan ta bezig cu esaki y e ta kere cu pa fin di aki tres, cuater luna, lo tin mas dato basa riba literatura pero tambe riba hecho.
