Parlamentario Ricky Hoek:
ORANJESTAD (AAN) – Parlamentario Ricky Hoek, di fraccion di Partido Movimento Electoral di Pueblo (MEP), a hiba palabra den e conferencia di prensa di e fraccion, dialuna cu a pasa.
El a elabora tocante e introduccion di “e ora minimo loon” of suelo minimo pa ora, cu lo drenta na vigor Dia 1 di Januari 2025.
El a bisa cu, como presidente di e Comision di Labor di Parlamento di Aruba, nan a yama un reunion cu Minister di Labor, señor Glenbert Croes, unda cu e mandatario hunto cu e Comision cu ta traha riba e sueldo minimo pa ora, a duna un splicacion extenso, tocante esaki, cu ta pa personanan cu ta gana salario minimo.
Hoek a bisa cu esaki ta un desaroyo cu a cuminza caba for di dos aña atras. Na 2022 a cuminza un investigacion profundo riba e mercado labora unda a haci un investigacion riba personanan cu ta traha entre 40 pa 45 ora pa siman, y hasta esnan cu ta traha mas cu 45 ora.
El a bisa cu esaki sigur ta pa motibo cu nan ta wak cu esnan cu ta traha den e sector aki, vooral e personanan cu ta gana un salario minimo pa luna, 74% di nan, ta traha seis dia pa siman, y 26% ta traha cinco dia pa siman. Esaki ta haci cu esnan cu ta traha 5 dia pa siman ta traha 40 ora, y e 74% cu ta traha 6 dia pa siman, ta traha 45 or of hasta 50 ora mas.
Den cuadro di esaki, e investigacion cu a wordo haci, tanto door di CBS, Departamento di Labor y tambe SER, a constata cu tin un discrepancia grandi den loke sueldo minimo ta pa luna, pa trahadornan den diferente sector y diferente horario di trabao. Y pa haci esaki na un manera mas husto, e ora ey a base di investigacion cu a wordo conduci pa dos aña, a sali na cla cu husto pa introduci un sueldo minimo pa ora. Esey kiermen, aworaki, cu tur persona cu ta traha 40 ora ta bay gana mesun sueldo. Si e ta traha 45 ora, naturalmente ta bay gana un poco mas, pasobra el a traha 5 ora extra y e 5 oranan ey mester wordo cubri pa e dunador di trabao y esey ta haci cu e ta bay tin un trato mas husto y un salario mas husto pa e mesun cantidad di ora cu e ta traha compara cu esnan cu ta traha mas, of menos ora. Esaki ta un liña recto pa tur persona cu ta gana salario minimo, Parlamentario Ricky Hoek a remarca.
