Melisa Stamper di RAPP:
ORANJESTAD: Red Arubiano di Prensa Profesional (RAPP) ta invita periodistanan, profesionalnan den medio di comunicacion y otro personanan interesa pa registra y participa na e di tres edicion di Caribbean Journalism Seminar, cu e aña aki ta enfoca riba e tema AI & Innovations.
E actividad ta wordo organiza den cuadro di Dia di Prensa, cu ta ser celebra dia 1 di september, y e aña aki RAPP a amplia su programa pa tres dia, combinando presentacionnan informativo cu workshopnan practico.
E seminario lo cuminsa awe, diabierna 25 di september, di 6:30 pa 8:30 di anochi na Impact Hub Aruba, cu participacion di tres orador, tanto local como internacional, cu lo comparti nan conocemento tocante diferente aplicacion y reto relaciona cu inteligencia artificial den periodismo.
Entre e oradornan tin Vincent Smit, Hefe di Redaccion di 1Almere na Hulanda, kende lo trata e tema Vibe Coding y con periodista por uza AI pa crea nan propio tools digital. Noel Algarín-Martínez, di Centro de Periodismo Investigativo di Puerto Rico, lo enfoca riba etica y inteligencia artificial, mientras cu specialista local den cybersecurity Rodolfo Rodriguez lo comparti conocemento relaciona cu uzo di tecnologia y AI.
E programa lo continua durante fin di siman cu dos workshop practico na ATIA Aruba. Diasabra, Laurens Ras lo brinda e workshop AI Essentials, enfoca riba e conocementonan esencial cu periodistanan mester pa incorpora AI den nan trabao diario. Diadomingo, Vincent Smit lo duna un workshop di Vibe Coding, na unda participantenan lo por aplica e conocemento y crea toolsnan digital cu asistencia di AI.
Segun Melisa Stamper, miembro di RAPP, e meta ta pa haci e conocemiento aki accesibel y trece tanto experiencia local como internacional pa Aruba.
“AI ta algo cu nos ta encontra den nos bida diario. Pa nos ta hopi importante pa periodistanan comprende con por uz’e como un tool den nan trabao, pero tambe conoce e aspecto etico relaciona cu su uzo,” Stamper a indica.
Participacion ta gratis pa periodista, independientemente si nan ta miembro di RAPP of no, pero registracion ta obligatorio. Otro personanan interesa tambe por participa pa un tarifa di Afl. 75. Registracion ta posibel tanto pa e seminario como pa e workshopnan.
