ORANJESTAD (AAN): Diahuebs mainta durante un conferencia di prensa, Prome Minister Evelyn Wever Croes a papia riba e tema di Media Raad.
“Mi kier enfoca riba esaki, pasobra mi a ripara cu den comunidad tin un confusion”.
Si bo mira den pagina 14 nos ta menciona cu den 2021 nos a cuminza cu e deliberacion y combersacionnan pa nos bin cu un Media Raad na Aruba.
Un Media Raad no ta algo cu nos mester tin miedo di dje, e no ta malo y tin Media Raad na hopi pais rond mundo, segun Prome Minister.
El a sigui bisa cu e Media Raad lo bira un tipo di fundacion cu Gobierno ta lanta, pero cu ta te eynan metemento di Gobierno den Media Raad ta yega.
“Nos ta lanta esaki pasobra nos ta kere cu ta importante pa tin un Media Raad, nos ta percura pa tin fondonan disponibel pa e fundacion aki por traha y den e fundacion ta bay tin representantenan di prensa y no di Gobierno”.
Representantenan di prensa skirbi, radio, television etc., segun Wever Croes.
Den e Media Raad ta bay tin tambe representantenan di organizacionnan cu ta sali na defensa di consumidornan.
Segun e mandatario esaki ta importante pasobra un rol importante di Media Raad ta pa proteha interesnan di consumidornan.
El a sigui bisa cu no ta Gobierno ta bay dicidi ta cua representantenan di prensa ta bay ta den e Media Raad.
Prensa mes lo dicidi ken ta drenta e Media Raad y na dado momento lo tin un presidente tambe pa un periodo defini.
“Media Raad no ta bay bira un polis pa mira ken a papia kico di kende”.
E ta un organo cu ta bay duna conseho, esta su opinion y no ta bay dicta y bisa hende kico nan tin cu haci.
Ora cu tin un situacion den cual tin un impase e Media Raad por duna su opinion.
Por ehempel si bo ta haya cu Gobierno no a haci un cos bon, e Media Raad ta duna un opinion riba esey publicamente.
Si prensa haci algo cu no ta bon, Media Raad ta duna su opinion of e por duna un recomendacion tambe, pero ta na e media si e ta sigui e recomendacion aki, segun Wever Croes.
E mandatario a sigui bisa cu un Media Raad ta hustamente locual nos tin mester di dje pa trece e trankilidad, pa no tin e polarizacion y pa bo tin un instituto independiente cu ta purba di tin e mihor calidad di prensa posibel na Aruba.
“E intencion di Media Raad ta pa mantene of eleva e nivel di prensa na e nivel cu un comunidad respeta manera Aruba mester tin y ta desea di tin”, segun Prome Minister.
