Debate 2021 a confirma e posicion di DIARIO riba informacion oficial pa eleccion - *Debate mester a compara maneho di cada gobierno den e situacion mundial - *Mester a informa hobennan di un periodo cu Aruba a zink y otro cu el sobrevivi
ORANJESTAD(AAN)—For di final di 2020 ora nos a cuminsa papia di eleccion 2021, nos a mustra cu ta necesario pa instancianan oficial di Aruba, manera Algemene Rekenkamer Aruba bini dilanti y duna Pueblo di Aruba tur informacion necesario pa cada votador por a vota a base di su consenshi y su sentido di responsabilidad pa su pais.
Sigur e hobennan di Aruba, cu no a conoce e realidad di desaroyonan politico durante Siglo 21, no a haya e splicacion cu nan mester a haya.
Kico mester tabata na discusion? Con mester a guia e debate aki y con mester a dirigi e debate cu tabata parce mas un show di moda cu un discusion politico?
Pa cuminsa tin regla especifico pa tene un debate y personanan cu ta entrena y educa riba e tereno special di guia un debate, cu ta exigi na prome luga cu nan sa di kico nan ta papia.
Kico tabata esencial den e debate pa e votado dicidi kico e ta haci na urna electoral na 2021?
Pa cuminsa Aruba mester a ricibi informacion di sucesonan nunca bisto cu a tuma luga den su historia democratico. E hoben mester a ricibi informacion financiero, economico y social di e Aruba cu a wordo destrui dor di Gobierno Mike Eman y e Aruba cu hunto cu Hulanda mester a lucha atrobe pa su autonomia y cu a wordo aplaudi pa instancianan manera IMF y ta traha riba futuro hunto cu Gobierno Hulandes.
E figuranan central den e prome debate, tabata Mike Eman y Evelyn Wever-Croes. E motibo ta masha simpel.
Tabata e maneho di Mike Eman, segun accion di Reino y tur rapport oficial, cu a manda Aruba bancarato.
Esaki no ta palabra inventa di DIARIO, pero loke Raymond Knops mes a bisa y te awe Mike Eman no a hiba Raymond Knops Huez pasobra Raymond Knops lo a practica mentira.
Raymond Knops na Mei 2020, a bisa henter Reino kico a pasa cu Aruba y pakico awe tin tanto problema pa Reino pone placa riba mesa como prestamo pa Aruba.
E hobennan, cu no tabata na haltura kico Mike Eman a haci cu placa di Aruba mester a haya e splicacion. E hobennan y henter Aruba cu a lubida kico Mike a haci cu Aruba cu el a laga destrui, mester a haya oportunidad di mira Mike Eman enfrente Evelyn Wever-Croes cu mester a soluciona loke Mike Eman a laga atras y segun entre otro International Monetary Fund hasta den pandemia a tuma tur medida necesario pa Aruba por a sobrevivi y awe sigui traha riba su futuro.
Ta pa preveni e calamidad cu a yama su mes Debate di siman pasa, cu DIARIO na hopi ocasion a trece dilanti, cu democracia ta exigi pa instancianan oficial resumi dilanti publico general di Aruba, loke a pasa cu e pais pa asina sigur hobennan por haci uzo di nan derecho di voto na forma responsabel.
DIARIO lo bay presenta na Aruba puntonan esencial den e columnanan aki pa asina votadonan di Aruba ta bon informa ora ta dicidi pa un futuro, cu na 2017 tabata un desaster pero awe ta prometedor segun rapport.
DIARIO lo trece resumen di e periodo di gobernacion di Aruba entre 2009 (na final di un recesion mundial cu a dal Aruba tambe) y e periodo di gobernacion na 2017 pa 2021 ora a base di un gobernacion responsabel, Aruba por bisa cu tin futuro
