Thomas Ruiz di Asociacion di Rijscholen ta splica:
ORANJESTAD (AAN) – Tin diferente instancia pa controla E-scooter, E-Bike, C-Bike y otronan. Señor Thomas Ruiz a splica esaki den entrevista cu DIARIO.
“DTP tin su parti pa controla. KPA tambe ta hacie, pero nos ta conciente cu KPA no tin suficiente personal pa haci control. Nos a haci sugerencia pa, por ehemplo, bin cu un raspaploeg, manera tempo di Shon Pe Krozendijk. Pa mi duna un ehemplo, na Aruba nan a parti aña pasa un total di 901 verbaal pa core sin rijbewijs. Na Curacao ta mas di 4000. Di con? Pasobra nan tin raspaploeg. Entre mas severo e control ta, mas e idea di cu bo por subi riba caminda sin ni un papel, ta bay baha. Pero menos control nan ta subi caminda apesar di e consecuencianan”, Ruiz a comenta.
VRA, pa medio di e charla di Bario ta duna informacion tocante e tema aki di E-scooter, etc., y esaki a haya un hopi bon acogida, pues e ta bayendo bon. “Hendenan ta keda babuca riba e problematica cu tin, y prome cos cu nan ta expresa ta ‘di con mi no tabata sa esaki’. Nos ta purba di concientiza pueblo riba kico ta pasando den practica. Nos ta trata di alerta nan di kico nan por topa riba caminda. Naturalmente, bo ta prepara un hende pa bay examen material, cu mi ta haya cu e mester wordo actualiza, di tal manera cu nos por alerta riba peligronan, cu no ta den e materia di examen di rijbewijs”, Thomas Ruiz, experto den trafico, a conclui.
