ORANJESTAD (AAN): E dianan aki por mira cu e contratista ta probecha cu no tin hopi awacero,
pa asina instala tubonan bao di tera a lo largo di cierto parti di Watty Vos Boulevard, pa por guia awanan cu ta aglomera riba e caminda durante awacero fuerte.
Ingenieronan a studia e caminda nobo aki pa mira unda tin areanan problematico, caminda plasnan grandi tabata acumula despues di yobida. Esey a encera instalacion di algun riool y duikers cu tuberianan nobo cu a wordo importa pa asina por wanta tur e liternan di awa cu lo tin di pasa aden pa e drenahe ta mas eficiente.
Esey ta e motibo cu aworaki ta cobando banda di Watty Vos Boulevard pa instala e tubonan aki cu ta sirbi como drenahe pa awa cu ta bay drenta via di riolering. Un suplica ta bay na chauffeurnan pa tene bon cuenta ora cu e trabaonan ta socede durante di dia.
