Pronostico di DIARIO ariba e resultadonan di situacion mundial y turismo confirma
*E turista cu mas entrada lo busca alternativa den cambio di clima y peligro di guera
ORANJESTAD(AAN)—For di momento cu e temporada halto di Aruba a cuminsa yega na su fin, DIARIO a presenta e realidad di loke Aruba mester spera na 2025 di turismo na su lectornan.
Aruba ta depende pa un gran parti di turismo for di Merca, cu ta tambe e motibo cu Aruba a conoce un “low” y un “high”season di turismo, cu ademas tabata depende di viaheronan for di cierto regionnan di Merca, caminda cambio di condicionnan di clima ta presenta nan mes.
Durante e temporada friu aumento di turismo tabata e inicio di e momento cu e turista tabata busca solo y lama despues di Thanksgiving, cu ta entrada di e Dianan di Fiesta mas celebra na mundo na cambio di aña.
Na cierto momento turismo den e temporada mas abou a cuminsa crece y henter aña turista ta bishita Aruba, manera ta wordo bisa.
Turismo ta un parti di economia. E ta basa ariba haci negoshi y e mester produci placa pa esnan cu a inverti den e ramo aki.
Un hende cu haci un inversion, kier saca su placa.
Aruba a conkista curazon di e viaheronan cu su Pueblo amabel, pero tambe cu su playanan bunita cu, contrario na hopi playa bunita na entre otro Merca, 12 luna pa aña ta cubri cu solo.
Mundo a cambia y solo a bira problema. Solo cu sigur den verano a perde tur clase di piedad y bira hasta peligroso pa salud di hende.
Pero ademas di esaki, tin mas cambio na mundo, cu ta bolbe na e situacion cu mundo a conoce prome cu Aruba a conoce e crecemento actual enorme di turista, cu a bira uno di e ramonan economico mas importante na mundo.
Turismo a crece mundialmente despues di Segunda Guera mundial, manera semper DIARIO a splica pero a conoce su momentonan di tension ora instabulilidad mundial a presenta.
Aki mester papia entre otro di momentonan grandi di tension manera e momentonan di cambionan politico revolucionario den region di Caribe cu a destrui varios destinacion turistico manera Cuba, den Caribe.
Turismo a sigui crece y sigur despues di Covid-19 a duna mas animo na biahe cu awor ta wordo confronta cu e realidad cu ningun hende kier acepta cu ta cambio di clima cu ta cambia e atraccion di lugarnan favorito di turismo.
Pero pio cu esaki e tension mundial creciente den cual paisnan ta invertiendo sumanan enorme pa guera, ta aumenta mientras mester admiti un grado di tension y falta di seguridad enorme den futuro.
DIARIO a spierta pa e situacion cu a surgi pero tambe a trece dilanti cu mester comprende cu e turismo cu ta nifica entrada enorme pa Aruba, ta hustamente e turismo di calidad cu e turistanan ta busca na acomodacionnan mas atractivo, cu mester ta mas caro pa e loke nan ta ofrece e turista.
Un turista cu por gasta placa kier lo mehor di mehor y e kier disfruta di su placa.
E situacion di clima y naturaleza no ta na fabor di Aruba den e temporada cu hasta e Arubiano tin problema pa cana den solo cu e calor tremendo.
E seguridad mundial actualmente ta nulo. Ningun hende por asegura cu un explosion mundial por presenta su mes cualkier momento manera lidernan mundial ta adverti.
Awe responsabilidad ta exigi pa papia berdad cu Pueblo di Aruba, manera DIARIO a haci basta tempo pasa.
Manera DIARIO a splica e loke mas tabata atrae turista, cu ta beach, awor a bira peligroso. Na mes momento e tension mundial ta haci cu e turista ta prefera di keda mas cerca di cas en espera tambe di medidanan cu ta wordo tuma financieramente dor di gobiernonan na Merca y Europa, cu lo afecta e turista tambe.
DIARIO ta entrega prueba atrobe di ta sirbi e interes di e Arubiano cu mas cu nunca awor mester di expertonan sincero, cu ta splica Pueblo e problemanan presentew pa asina hunto por traha riba un futuro cu generacionnan nobo merece.
