Turismo y Salud Publico por bira e gran perdedor den e reto -- *Celebracionnan fin di 2021 y inicio 2022 por produci placa -- *Celebracionnan cambio di aña y Carnaval por destrui futuro
ORANJESTAD (AAN) — Na Hulanda ya instancianan importante a cuminsa scrap Carnaval, cu segun un cantidad importante di fanatico, mester por a tuma lugar.
E motibo cu for di awor ta papia di cancelacion di tur festividad publico den cuadro di Carnaval 2022, cu lo cera Februari pa habri luna di Maart 2022, ta debi na e hecho cu Hulanda mescos cu cantidad di otro paisnan, mester a tuma medida atrobe contra Covid-19.
Aruba di e forma aki ta haya indicacion, kico e por spera pa dianan di fiesta, cu generalmente ta cuminsa cu Thanksgiving, y ta culmina cu Pasco y Fin di Aña pa despues Carnaval conoce apertura.
Na momento cu Gobierno y tur instancia envolvi tuma decision kico lo pasa, tur pro y contra mester ta den balansa cu solamente por wordo sigui cu responsabilidad na bista.
Dianan di Fiesta y Carnaval cu pa loke ta trata fecha ta sigui otro directamente, ta produci placa.
En general, ta tempo cu Aruba ta haya mas turista, pero tambe den e circulo intimo local tin mas intercambio di producto ora situacion ta favorabel y tin actividad comercial.
E grupo di comerciante mas chikito di Aruba ta beneficia den forma di entre otro platonan special cu ta wordo traha pa e temporadanan aki, articulonan di adorno y pa carnaval naturalmente disfras.
Benta di cuminda y bebida ta aumenta y placa di ahorro ta bay pa bisti segun e tradicion di fiestanan di Aruba.
Carnaval y Temporada di Pasco pues ta genera actividad economico hasta pa celebra Dande.
Pero kico por pasa si no actua cu responsabilidad?
E paso di 2021 pa 2022 manera DIARIO a bisa y ta sigui bisa, lo ta dificil. Prijs rond mundo ta sigui aumenta pero tambe cifranan espantoso di casonan nobo di Covid-19 cu ta haci cu na fin di 2021, hende no ta yama Covid-19 ayo manera a spera, pero hende mas cu nunca tin miedo pa Covid-19 no destrui loke a resta pa destrui.
E placa cu por gana si habri portanan pa celebracionnan cu lo produci entrada pa un rato, ta nada compara cu e desaster cu por wordo spera den un mundo, cu ya a wordo seriamente afecta pa Covid-19.
Hospitalnan yen na tanto parti di mundo. Medidanan nobo pa biaha y hasta pa hende comunica cu otro lo afecta economia na forma negativo.
Turismo lo conoce un impacto directo mescos cu industrianan y otro sectornan di produccion di articulonan.
Responsabilidad mester guia hende awe.
Mester fiha prioridadnan na tur forma.
2022 lo ta sumamente dificil. Pero e por bira mas dificil, si e ultimo ola di Covid-19 paralisa mundo atrobe y exigi paisnan cera nan porta.
Esaki por socede sea pa decreto gubernamental of pa exigencia directo di Covid-19 cu por bolbe baha e cantidad di turistanan cu por subi avion y por bolbe subi e gastonan enorme di cuido medico, cuido social, pa cual no tin placa mas.
E situacion mundial ta hopi serio. E situacion mundial por wordo confronta solamente cu e sentido di responsabilidad pa por habri porta pa futuro.
Hende ta dicidi awe, rond mundo, con e ta drenta 2022 y con e ta atende cu creacion di e futuro cu e tin den su man!
