LONDON: Ciudadanonan ya ta fada y disgusta di algun chauffeur, cu ta djis usa caminda publico pa nan revv motor di nan vehiculo,
ta spin nan wielnan, usa turbo-charged engine pa asina keda drift cu nan auto rond di rotonde, y produci sonido cu ta lanta tur baby marduga for di soño den casnan na yoramento.
Autoridad awor ta instalando equiponan special di ‘Noise-detecting traffic cameras’ den cuatro area di Inglatera, cu e plan pa asina cuminza actua mas duro contra chauffeurnan cu ta kere cu nan ta den pelicula di 2Fast 2 Furious riba caya, y ta usando motornan modifica y muffler ilegal, y ta drift y produci sonido.
Departamento di Transporte na Inglatera a bisa cu e Noise-cameras aki lo wordo instala prome riba caminda di Bradford e siman aki, y den proximo simannan lo haci esey na Bristol, na Great Yarmouth, y tambe na Birmingham.
Ademas di capta e sonido cu varios microfono direccional y manda un alerta, e videocamera lo capta imagen di e vehiculonan, pa asina yuda Polis identifica e chauffeurnan aki cu ta kibrando ley door di revv nan motor innecesariamente, of ta usa muffler ilegal ora di pasa.
Gobierno di Inglatera a inverti 300.000 Libra (como 607 mil Florin) den e equipo aki y a test esaki riba un pista priva. E lo wordo usa pa crea un pakete digital di prueba contra e chauffeurnan, pa asina nan haya multa.
Polisnan a logra identifica e zonanan cu ta mas afecta pa e molester di sonido aki. Parlamentarionan a aplica tambe pa e cameranan special aki wordo instala den nan area. E prome Noise-cameras lo wordo poni den area unda e problema ta mas severo actualmente.
Pues di awor en adelante, motociclistanan of chauffeurnan cu ta revv motor, ta spin, drift, of usa muffler ilegal no mester worry mas cu tin Polis eybanda. E cameranan mes lo documenta tur cos, y e chauffeur lo bay haya su multa bunita asina via post.
Como cu ta haci uso di diferente microfon direccional, e camera por detecta claramente ta cual auto ta produciendo e sonido.
