Merry Werleman y e Comision ta trahando duro y e caso ta den man di abogado David Kock
ORANJESTAD (AAN) – Matutino DIARIO a entrevista señora Merry Werleman, Secretaria di e Comision di AOV cu ta cobra pension di Curacao, ken a pidi nos haci un aclaracion tocante un articulo incorecto cu a sali publica den nos Matutino, Diabierna 6 di October cu a pasa.
E articulo skirbi na Hulandes, a bira viral riba Facebook, incluso cu firma di un Huez y esaki a worde publica pa un pensionado pa tur esnan cu ta pasando den e situacion cu SVB Curacao a corta e pension di esnan cu ta cobre na Aruba cu 10% y a kita completamente nan kerstbonus, desde 2017.
Loke a worde publica den facebook e mesun dia 6 di October cu a pasa, ta un supuesto sentencia di Huez, cu e pensionadonan concerni, tin cu worde paga tur loke a kita di nan y retroactivo. DIARIO a haya e publicacion y a kere cu ta algo corecto ya cu e Comision a reuni dos biaha cu e pensionadonan afecta.
Pero e Comision ta trahando duro si, pa lanta un caso, cu ainda no a sosode pasobra ta un proceso largo. Kiemen, nan no tin nada di haber cu e publicacion riba facebook. Señora Werleman a tuma contacto cu SVB Curacao, unda el a worde bisa cu nan, ningun momento, a saca tal publicacion, y ningun Caso den Corte a worde procesa ainda tocante e asunto aki.
Señora Werleman ta reitera na tur e pensionadonan cu ta cobra pension di AOV Curacao na Aruba, y cu ta yama na su telefon tocante e publicacion menciona, cu esaki tabata un “fake news” cu no mester a worde publica pasobra el a crea hopi confusion, innecesariamente.
Otro aclaracion cu señora Werleman kier a haci ta cu OPPA no tin nada di haber cu e Comision. Ta djis nan ta ocupa un espacio den e edificio di OPPA.
Actualmente, e caso ta den man di Abogado David Kock y señora Werleman, asina cu e Abogado dun’e contesta, e Comision ta yama reunion. Tambe ta bon pa remarca cu e Comision ta traha gratuitamente y na un manera serio.
Finalmente, señora Werleman ta recorda tur e pensionadonan concerni cu ta inscribi na e Comision, y cu ainda no a paga e contribucion pa por fabor cumpli cu’ne. Esun cu ta keda sin paga su nomber no lo bin pa e caso den Corte.
