Un pregunta grandi ta surgi den formacion Gobierno Hulandes -- *Hulanda ainda sin Gobierno ta subi caminda di consulta -- *Portanan di Den Haag politico ta habri pa sondea opinion
ORANJESTAD (AAN) — Nan mes ta papia di un “cultura nobo di gobernacion”. Cu e palabranan aki e dos candidatonan na turno pa trata na yega na formacion di un Gobierno nobo pa Hulanda, a anuncia nan decision pa bay sinta na mesa cu dos “grupo di interes” na Hulanda pa scucha kico ta biba den Pueblo.
Cu hopi interes, DIARIO a sigui e ultimo intento (te awor) pa yega na formacion di un Gobierno nobo pa Hulanda cu for di Maart 2021 a bay urna electoral despues cu dos luna prome, gobierno a cay.
No tabata pandemia cu exactamente a basha e di tantisimo gabinete Mark Rutte abou. Tabata mas tanto sucesonan cu a pone un cantidad di ciudadanonan Hulandes yora y pasa den problema serio, manera e “toeslagenaffaire”, e scandal di compensacionnan cu hendenan mester a ricibi pero cu a bira nan condena.
Awe hunto cu “teremotonan” cu tambe ta sacudi mundo politico na Hulanda, “Toeslagenaffaire” a bira topico cu lo subi mesa ora e dos informadornan di turno, continua cu nan trabou.
Nan ta bay papia cu gruponan den comunidad, loke segunan ta un cambio den cultura di gobernacion Hulandes, cu ta wordo considera uno di e gobiernonan mas democratico, mas tolerante, mas habri pa tur cambio cu hende por pensa, pero cu tin problema pa forma su mes.
Mientras ainda e dos informadornan no por bisa cu esaki ta e solucion pa yega na un Gobierno,. DIARIO a realisa cu loke realmente e informadornan Hulandes ta aplica actualmente como un base nobo pa goberna, ta hustamente loke mr. Evelyn Wever-Croes, Prome Ministro di Aruba, a uza como su modelo pa forma un Gobierno na 2021.
Nos no kier bisa directamente cu e Informadornan Hulandes di turno, a dicidi di imita e forma cu Evelyn Wever-Croes a hiba consulta cu Aruba, pa awor bay scucha hendenan cu segun nan por splica kico a bay robez den politica na Den Haag pa asina nan por evita “loke a bay robez” si nan logra forma un Gobierno.
Ora tuma nota di nan palabra, mester bolbe na e momento di formacion di Gobierno MEP/RAIZ despues di eleccion 2021 na Aruba.
E forma cu Prome Ministro Wever-Croes a dicidi pa scucha henter comunidad den formacion di un Gobierno na un momento historico pa Aruba, a haya hopi atencion.
Un sistema nobo, pa duna contenido na democracia, a wordo utilisa pa asina por a forma e actual Gabinete Evelyn Wever-Croes 2 na Aruba.
E sistema cu a wordo aplica, a haci cu formacion a tuma su tempo pero Aruba a haya un gobernacion.
Awe ta parce, cu Prome Ministro Evelyn Wever-Croes a entrega Hulanda tambe un formula con pa aplica democracia na un momento dificil cu mundo ta den un pandemia y un crisis petrolero.
Pero Hulanda, cu ta wordo considera uno di e paisnan mas rico na mundo, tin un problema mas grandi cu ta e credibilidad di politica, di aparato gubernamental y e forma con ley por bolter contra ciudadano inocente cu ta bira victima di servicionan di Gobierno cu ta faya.
DIARIO ta sigui e desaroyonan na Hulanda, caminda ya Raymond Knops a cuminsa despedi sin cu e ta na haltura di e fecha cu lo tin un Gobierno Hulandes nobo.
Un speransa grandi pa Hulanda sigur ta bira cu porfin ta bay scucha e gruponan cu tabata e base pa Gabinete Rutte entrega su retiro pa asina trata na comprende con un aparato gubernamental por habri heridanan serio den un comunidad no solamente lastima, pero hasta persigui legalmente, pasobra e aparato gubernamental a faya.
Un satisfaccion sigur ta bibo na Aruba, caminda Prome Ministro Wever-Croes a entrega Reino un formula pa consulta cu Pueblo ora ta forma Gobierno. Un formula cu awor Hulanda ta aplica!
