ORANJESTAD (AAN): SKOA ya caba ta den ful swing aceptando aplicacion di muchanan cu ta bay cuminsa kleuter y tambe di ruman di alumnonan di SKOA. Pronto lo cuminsa acepta aplicacion general pa tur scol di SKOA.
Pa locual ta trata e aña escolar nobo di 2023-2024 tin cambionan den e suma di contribucion di “schoolgeld y airco geld” pa e scolnan di SKOA. Esaki ta importante pa mayornan ta na altura di dje pa asina por completa tur aplicacion di muchanan debidamente. Esakinan ta e tarifa nobo di contribucion di mayor pa e aña escolar binidero:
Pa kleuterschool schoolgeld ta 250 Florin, y aircogeld ta 150 Florin. Pa basisschool schoolgeld ta 275 Florin y aircogeld ta 150 Florin. Pa MAVO School e schoolgeld ta 350 Florin y aircogeld ta 150 Florin.
Ta importante pa mayornan ta bon informa di e rekesitonan di SKOA pa por (re)inscribi exitosamente. E rekisito pa por haci (re)inscripcion pa aña escolar nobo pa 2023-2024, ta cu mester tin e contribucion di “schoolgeld y airco geld” completamente paga di aña escolar 2022-2023. Mayornan cu ta desea pa haci peticion pa un areglo di pago por haci esaki entrante 1 di april 2023.
Pa mayornan cu no (re) inscribi nan yiunan na tempo of cu no ta cumpli cu e rekisitonan di SKOA por tin consecuencia caminda e aplicacion por worde cancela.
Esaki por resulta cu e mucha no ta bay tin su luga sigura pa e proximo aña escolar. Pa preveni esaki SKOA ta conseha pa mayornan haci aplicacion na tempo pa asina (re) inscribi nan yiunan debidamente, pa asina sigura nan luga na un scol y cumpli cu su derecho na enseñansa.
Pa mas informacion tocante aplicacion y contribucion di mayor por bishita e website skoa.aw.
