Aruba continuamente mester vigila medidanan Gobierno Mericano --- *Resultadonan aumento di prijs y turismo den centro di atencion * Incentivonan nobo pa atrae mas turista ta e solucion y prioridad
ORANJESTAD(AAN)- Tur indicacion ta cu proximamente gobierno Mericano lo tuma mas medida cu lo afecta e costo e ciudadano Mericano directamente.
E resultadonan pa turismo for di Merca, ta keda topico den mundo internacional di turismo caminda sigur e barconan crucero ta trata na tur forma pa splica mundo, cu inflacion no ta afecta nan.
Ya no ta papia di resultadonan cu ta spera na 2023, pero a cuminsa papia tambe di 2024.
Informantenan clave pa loke ta trata turismo crucero na Merca, a splica DIARIO cu e hecho cu prijsnan ta subi den bida diario na Merca, ya tin impacto riba cantidad di persona cu di antemano ta haci nan reservacionnan pa biahenan den futuro.
E preocupacion pa resultado cu medidanan di Gobierno na Merca pa stop inflacion ta mes grandi cu e preocupacion cu ta existi rond mundo pa e forma cu e aumento internacional di prijsnan lo forsa hende di baha nan gastonan loke ta nifica tambe gasta menos durante vacacion, si ta bay cu vacacion.
Informacionnan ricibi di exterior ta indica cu no mester lubida cu directamente despues di Omicron, en entusiasmo pa biaha despues di lockdown, tabata sumamente grandi.
Esaki na e momentonan aki ta provoca e pensamento cu turismo internacional ta conoce un aumento mientras cu inflacion por tin impacto grandi riba e resultado turistico internacional na 2022, 2023 y hasta 2024 manera ta wordo indica.
Na Merca sigur medidanan di Gobierno ta continua y ta efecto riba gastonan basico di poblacion, cu asina ta wordo pusha den direccion pa gasta menos placa y yuda combati inflacion.
Prijsnan mundial ta sigui subi hunto cu asina e costo di bida cu no ta soporta medidanan di Gobierno di Merca, cu ta subi taza di interesnan di debe loke ta un peso mas grandi pa e grupo cu tin propiedad por ehempel.
Informantenan a indica cu mester tene na consideracion cu e medidanan di gobierno Mericano pa hende gasta menos, ta afecta principalmente e grupo cu tabata gasta mas den ultimo temponan y cu a causa un crecemento enorme di turismo.
E clase medio, cu a bira e forsa grandi di comercio internacional, ta hustamente e victima principal di e medidanan cu a wordo tuma na Merca. Nan no tin e placa cu e grupo mas rico tin na su disposicion pa a pesar di medidanan sigui haci gastonan manera di biahe.
Segun informacion ricibi di exterior y den contacto cu informantenan cu otro destinacionnan den Caribe por comprende, cu interesnan comercial na paisnan cu kier atrae turismo mester tene e situacion na consideracion, vigila desaroyonan pero tambe cuminsa desaroya incentivonan pa asina evita cu inflacion y medidanan cu Gobierno Mericano tuma, por ta detrimental pa destinacionnan manera Aruba.
