Compara cu aña pasa e ta 2.1 porciento
ORANJESTAD (AAN): Oficina Central di Estadistica e siman aki a emiti nan relato encuanto e Indice di Prijs di Consumo (CPI) pa luna di Mei 2026.
Cifranan a demostra cu e CPI pa luna di Mei 2026 ta 111.90, loke ta representa un subida di 1.0% compara cu e indice di April 2026.
E cambio di e CPI pa e ultimo 12 lunanan (Mei 2025 te cu Mei 2026) ta 2.1%, un subida di 2.0 punto di porcentahe (ppt) compara cu e periodo corespondiente di aña pasa (0.1%).
E promedio anual (ultimo 24 luna) di e tasa di inflacion pa e periodonan di Mei 2024 te cu Mei 2025 y Mei 2025 te cu Mei 2026 ta 0.4%, un caida di 0.7 ppt compara cu e 1.1% registra den e periodonan di Mei 2023 te cu Mei 2024 y Mei 2024 te cu Mei 2025.
Durante e luna aki, 9 di e diesdos sectornan a registra subida di prijs. E subidanan cu tabatin e mayor efecto riba e CPI a wordo registra pa e sectornan di “Transporte” (3.3%), “Paña y sapato” (12.9%) y “Comunicacion” (2.7%), causando un efecto di respectivamente, 0.44, 0.25 y 0.25 ppt. E subidanan den e
sectornan restante a contribui cu un efecto di 0.32 ppt riba e CPI di Mei 2026.
E subidanan aki a wordo contraresta parcialmente door di principalmente un caida den e indice di e sector di “Mobilario” (-3.1%), cu a contribui cu un efecto di -0.25 ppt riba e CPI di Mei 2026. E caida den e sector restante a contribui cu un efecto insignificante riba e CPI di Mei 2026.
E subida den e sector di “Transporte” a wordo causa principalmente door di un subida di 4.2% den e categoria “Gasto relaciona cu uso di vehiculo di transporte personal”, causando un efecto di 0.35 ppt. E subida den e sector di “Paña y sapato” a wordo causa principalmente door di un subida den e categoria
“Paña” (13.6%), causando un efecto di 0.21 ppt. E subida den e sector di “Comunicacion” a wordo causa door di un subida di 29.3% den e categoria “Ekipo di telefon y fax”, causando un efecto di 0.25 ppt.
E caida den e sector di “Mobilario” a wordo causa principalmente door di caidanan den e categorianan “Aparato pa uso domestico” (-7.1%) y “Herment y ekipo pa cas y hardin” (-8.7%), causando un efecto di respectivamente, -0.13 y -0.07 ppt.
Canasta di Consumo: E canasta di consumo di e CPI ta consisti di 408 bienes y servicionan. Compara cu April 2026, 49.8% di e bienes y servicionan aki a conoce un aumento di prijs causando un efecto di 1.65 ppt, mientras cu 32.6% ta mustra un caida di prijs, cu a contribui cu un efecto di -0.64 ppt y pa e restante 17.6% no tabata tin cambio den prijs. Compara cu April 2026, prijsnan di bienes (1.4%) y servicionan (0.4%) a conoce subida y a causa un efecto di respectivamente, 0.83 y 0.18 ppt riba e CPI di Mei 2026.
Core Inflation: E asina yama CPIC (core inflation) ta un calculo di CPI excluyendo e efecto di energia y cuminda. Pa luna di Mei 2026, e CPIC a conoce un subida di 0.9%. E indice di energia (cu ta consisti di e productonan: electricidad, awa, gasolin y diesel) a registra un caida di 2.3%. E indice di cuminda a registra un subida di 1.2%.
