Cifra di CPI suministra pa Oficina Central di Estadistica
ORANJESTAD (AAN): Indice di Prijs di Consumo pa luna di Februari 2023
E CPI pa luna di Februari 2023 ta 107.59, loke ta representa un subida di 0.8% compara cu e indice di Januari 2023 (106.69).
E cambio di e CPI pa e ultimo 12 lunanan (Februari 2022 te cu Februari 2023) ta 7.1%, un subida di 3.6 punto di porcentahe (ppt) compara cu e periodo corespondiente di aña pasa (3.5%).
E promedio anual (ultimo 24 luna) di e tasa di inflacion pa e periodonan di Februari 2021 te cu Februari 2022 y Februari 2022 te cu Februari 2023 ta 6.1%, un subida di 4.4 ppt compara cu e 1.7% registra den e periodonan di Februari 2020 te cu Februari 2021 y Februari 2021 te cu Februari 2022.
Durante e luna aki, 8 di e diesdos sectornan a registra subida di prijs. E subidanan cu tabata tin e mayor efecto riba e CPI a worde registra pa e sectornan di “Transporte” (3.9%) y “Recreaccion y cultura” (2.3%), causando un efecto di respectivamente, 0.53 y 0.21 ppt. E subidanan den e restante sectornan a contribui cu un efecto di 0.39 ppt riba e CPI di Februari 2023.
E subidanan aki a worde contraresta parcialmente door di principalmente caida den e indicenan di e sectornan di “Restaurant y hotel” (-2.9%) y “Vivienda” (-0.5%) cu a contribui cada uno cu un efecto di -0.14 ppt riba e CPI di Februari 2023. E caidanan den e restante sectornan a contribui cu un efecto di -0.01 ppt riba e CPI di Februari 2023.
E subida den e sector di “Transporte” a worde causa principalmente door di un subida di 6.5% den e categoria “Gasto relaciona cu uso di vehiculo di transporte personal”, causando un efecto di 0.53 ppt. E subida den e sector di “Recreacion y cultura” a worde causa principalmente door di un subida den e categoria “Vacacion” (10.4%), causando un efecto di 0.26 ppt.
E caida den e sector di “Restaurant y hotel” a worde causa door di un caida den e categoria “Servicio di alohamento” (-65.7%), causando un efecto di -0.17 ppt. E caida den e sector di “Vivienda” a worde causa door di un caida di 2.8% den e categoria “Mantencion y reparacion di vivienda”, causando un efecto di -0.15 ppt.
Canasta di consumo: E canasta di consumo di e CPI ta consisti di 408 bienes y servicionan. Compara cu Januari 2023, 50.0% di e bienes y servicionan aki a conoce un aumento di prijs causando un efecto di 1.62 ppt, mientras cu 35.5% ta mustra un caida di prijs, cu a contribui cu un efecto di -0.78 ppt y pa e restante 14.5% no tabata tin cambio den prijs.
Prijsnan di bienes a subi cu 0.9% y a causa un efecto di 0.56 ppt. Prijsnan di servicionan a conoce un subida di 0.7% y a causa un efecto di 0.28 ppt riba CPI di Februari 2023.
{gallery}Indice di prijs di consumo na Februari a subi cu 0,8 porciento{/gallery}
